Sa provìntzia de Aristanis est preparendesi a sa Domìniga de Prama

Novas Aristanesas, giòbia 26 de martzu de su 2026

Sa provìntzia de Aristanis est preparendesi a sa Domìniga de Prama – Nd’est benende sa Domìniga de Prama, chi marcat s’incomintzu de sos ritos de Chida Santa, e finas sas comunidades de sa provìntzia de Aristanis sunt preparende·si, intre fide, arte e traditzione, filende cun diligèntzia sas fògias de prama chi ant a acumpangiare sos fideles in protzessione.

In biddas meda de sa provìntzia, sa filadura de sas pramas destinadas a mudare sas crèsias pro sa Domìniga de Prama si faghet finas ocasione pro si riunire paris e motivu de fervore comunitàriu.

Pro sa traditzione, sas filaduras – comente ispiegant dae s’Archi-diòtzesi de Aristanis – sunt diversas a tenore de sa càrriga sotziale o de su servìtziu chi si dat a sa comunidade. Pro esempru:

“Sas cunfradias s’impignant a filare sas pramas e a nde dare a sas parròchias chi non nde tenent” at naradu a s’Archi-diòtzesi de Aristanis Pino Cossu, priore de sa cunfradia de s’Ispìritu Santu de Narabuìa. “In Sèneghe” ispiegant Antonio V. Sechi e Neil Lotta “in antis de Mesaustu prendimus sas puntas de sas pramas pro chi non si nde sichent. Ogni annu nde filamus prus o mancu 600. Sa prama de su preìderu est sa prus simple e l’at a acumpangiare pro totu sa Chida Santa, pro èssere brusiada in su brasieri su Mèrcuris de Chinisu”.

In Neoneli, imbetzes, si usat chi sa priorissa aprontet pramas particulares pro su grupu de Sa rega: sas chimbe massajas, chi sunt responsàbiles pro un’annu de sas mudaduras, ant a retzire una prama prus decoradas, sìmbulu de su ruolu chi tenent.

In Luri, fratzione de Arborea, a su sòlitu sunt sos giòvanos de s’oratòriu chi aprontant pramas e carchi ogetigheddu de regalare. In Samugheo s’assòtziu Il Giardino Fiorito aprontat sas pramas ornamentales e sas ofertas serbint pro agiuare s’atividade pro sos pitzocos cun disabilidade, dae sa terapia a caddu a sos esertzìtzios de nàdidu.

In ùrtimu, in Santa Justa at a tocare a sos cunfrades e a sos voluntàrios, capitanados dae su mastru Verino Cruccas, a trasformare sas pramas in òperas de arte, mantenende bia sa traditzione antiga.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.