Sa provìntzia de Aristanis aprontat sa mesa pro Pasca

Novas Aristanesas, martis 31 de martzu de su 2026

Sa provìntzia de Aristanis aprontat sa mesa pro Pasca – Sa Pasca, fintzas in sa provìntzia de Aristanis, est un’intritzu de fide, memòria e cunvivialidade.

Paris cun sas protzessiones e sos ritos religiosos chi bi sunt in ogni bidda, fintzas sa mesa est de importu pro sa festa, cun màndigos chi narant contos antigos e gestos tramandados dae generatziones.

Su menù de Pasca in fatis est unu biàgiu in sos sabores de sa traditzione sarda, in ue ogni màndigu tenet unu significadu simbòlicu acapiadu a sa nàschida noa e a sa cumpartzidura.

Dae sos antipastos a sos primos, non mancant sas retzetas de sas ocasiones de importu. Intre custas ispicant sos culurgiones, chi si faghent a su prus in dies de festa, a pustis sos segundos de petza in ue su protagonista est s’angione, bortas meda coghinadu cun cartzofa, segundu una de sas retzetas prus difusas in sas domos de sa provìntzia de Aristanis.

A canta a sa petza b’est puru su casu locale e su pane, elementu chi non podet mancare in ogni festa chi si rispetet. Sìmbulu de sa Pasca Manna est su cocoi cun s’ou, su pane traditzionale de sìmula abbellidu cun s’ou, fatu sa Chenàbura Santa o su Sàbadu e servidu in sas dies de festa. Sa forma sua ammentat su sole o una pudda pitica e rapresentat vida, fertilidade e nàschida noa. In tempus passadu si donaiat a parentes e pitzinnos comente augùriu de prosperidade. Paris cun sos cocois bi sunt sos panes pintados fatos cun fòrfighes e pintzetas e custos sighint a testimoniare s’abilidade de sas manos espertas chi los modellant in formas diversas pro ogni ricurrèntzia. Intre sas biddas de sa provìntzia de Aristanis, Biddobrana e Pompu sunt sas prus connotas in su traballare su pane.

A concrùere su pràngiu, bi sunt sos durches de sa traditzione, sas pàrdulas: corbingioleddos de pasta violada prenos de regotu, tzùcaru e tonforanu, profumados cun limone e aràngiu. Mancari oe in sas mesas bi siant columbas e oos de tziculate, custas ispetzialidades sunt ancora protagonistas in sas mesas de sos sardos.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.