Movet su Prèmiu “Maistros de Primore” de Confartesania

Novas Aristanesas, mèrcuris 25 de martzu de su 2026

Movet su Prèmiu “Maistros de Primore” de Confartesania – Su valore de su ischire fàghere artesanu torrat protagonista cun su Prèmiu “Maistros de Primore 2026”, su cuncursu natzionale cuncordadu dae Confartesania Impresas pro avalorare s’abilesa e is impresas de su setore de su tessìngiu, de sa bestimenta, de is iscarpitas, de is maistros de pannu, de is fraigadores de ullieras, de su setore de is prendas e, a manera prus generale, de totu su setore de sa moda e de sa mobìlia. Su cuncursu est abertu fintzas a is artesanos sardos e oferit un’ocasione de visibilidade e de crèschida professionale de importu.

Su prèmiu, lòmpidu a sa de bator editziones, ddu cuncordant Métiers d’Excellence LVMH cun Confartesania Impresas e Càmera Natzionale de sa Moda Italiana, cun su partenariadu de sa Fundatzione Bvlgari. Punnat a favorèssere s’imbentu, s’annoadura e sa calidade arta de sa manifatura de is artesanos chi traballant in is setores de su lussu e de su produsimentu artìsticu. Faghet a si-ddoe iscrìere fintzas a su 31 de su mese de maju.

Su cuncursu est abertu a artesanos e impresas cun sea in Itàlia, ativas dae a su mancus 12 meses, e est partzidu in tres categorias: Maistru Artesanu de Primore, pro professionistas chi tenent a su mancus 10 annos de esperièntzia; Maistru Noeddu Artesanu de Primore, dedicadu a is chi si sunt seberende dae pagu tempus; Maistru de s’Annoadura de Primore, pro chie at ischìpidu torrare a interpretare s’arte de su connotu a manera moderna. Faghet a pigare parte a una categoria isceti.

Is primos classificados ant a bìnchere unu prèmiu de 10.000 èuros de torrare a investire in s’atividade issoro, a prus de sa visibilidade mediàtica, de un’annu de iscola fata cun professionistas de Bvlgari e de is bìsitas a is istabilimentos de sa Maison, pro connòschere is protzessos de produsimentu e pro averiguare sa possibilidade de collaboratziones.

Comente decrarat Giacomo Meloni, presidente de Confartesania Impresas Sardigna, custu reconnoschimentu est una manera “pro apretare s’atentu de s’opinione pùblica in contu de s’importu de allogare e fàghere a connòschere sa sienda de su ischire fàghere e sa sabidoria de is artesanos italianos in su setore de su lussu”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.