Festas mannas, natura e cultura in sa coa de chida in provìntzia de Aristanis

Novas Aristanesas, chenàbura 13 de martzu de su 2026

Festas mannas, natura e cultura in sa coa de chida in provìntzia de Aristanis – In provìntzia de Aristanis una coa de chida prena de eventos.

In Siamajore torrat sa de 31 editziones de sa Festa de sa Cartzofa. Cras aberit sa festa su cunvegnu “Il carciofo: storia, identità e territorio. Valorizzazione delle eccellenze” e a pustis assàgios de màndigos e laboratòrios de coghina finas a domìniga.

In sas matessi duas dies, in Milis, su Giardinu de Villa Pernis Vacca est torra su coro de sa de 24 editziones de Primavera in Giardino intre cunvegnos, laboratòrios e vìsitas acumpangiadas. Tema de ocannu “S’arantzu de Milis in su giardinu torradu a agatare”.

Oportunidades pro su gustu e pro sa traditzione, domìniga, cun Frituras in sa carrera de Crèsia de Nurachi. Sunt protagonistas, sena duda, sas tzìpuas, sos arubiolus, sos cruguxionis de lati e parafritus, e non podet mancare sa garnatza. Sunt prevìdidas finas escursiones naturalìsticas a s’òasi de Pischeredda e a s’istagnu de Crabas, sena contare sa coghina in presèntzia, sos màndigos de istrada e s’aperitivu in sos magasinos istòricos.

In Aristanis, Marianna e Marco Morandi faghent s’aparitzione issoro custu sero in su teatru Garau pro sa rassigna de su Cedac cun sa cumèdia “Benvenuti a Casa Morandi”. Semper oe, s’omàgiu de su coro feminile Sa Pintadera de Aristanis a Gràssia Deledda cun sa de 13 editziones de “Donne in… Canto” in s’auditòrium de s’Istitutu “L. Mossa”. E ancora, custu sero si faeddat de s’istòria de Arbus cun su libru “La tonnara di Flumentòrgiu” de Francesca Trebino, in sa sala de su Tzentru de Servìtzios culturales Unla, imbetzes in s’Hospitalis Sancti Antoni, pro sa sèrie de atopos “Storie dell’Arte”, si presentat sa rivista Lollove Mag. In ùrtimu, cras sero Davide Piras presentat su libru suo “Femmenella” in su Museu Diotzesanu.

In Bilartzi, dae cras e finas a domìniga b’est “Festas Ghilarza” a incuru de su grupu folk Onnigaza pro sos chimbanta annos de atividade. Custu sero, in ùrtimu, in sa turre aragonesa s’eventu musicale “Eterne nel dolore. Sas eroinas tràgicas mannas de su melodramma”.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.