Festas, cultura e eventos in sa coa de chida in provìntzia de Aristanis

Novas Aristanesas, chenàbura 27 de martzu de su 2026

Festas, cultura e eventos in sa coa de chida in provìntzia de Aristanis – Eventos meda in sa coa de chida in provìntzia de Aristanis. Domìniga in Boroneddu b’est sa de 37 editziones de sa Sagra de s’ispàragu e de su fenugru agreste. In prus de sos assàgios de màndigos e de sos ispetàculos musicales, b’at finas passigiadas in gommone peri su lagu Omodeo.

In Aristanis, custu sero b’est sa Via Crucis tzitadina ghiada dae s’archi-pìscamu mussegnore Roberto Carboni, e in su Teatru Garau pro su de 8 apuntamentos de Cedac si rapresentat sa cummèdia surreale “L’uomo dei sogni”.

Limba e literadura sarda custu sero in s’Unla pro sa presentada de su libru “Sas cantones de Publio Dui” de Dino Manca, cun Simone Pisanu e Antoni Nàtziu Garau e sas leturas de Maria Teresa Rosu.

Ispiritualidade, teatru e solidariedade cras sero in sa sala teatru de sa crèsia de Santu Giuanne Evangelista pro s’ispetàculu “La Croce e il Paradiso” e domìniga in su Mutuo Soccorso sa de 2 editziones de Vinyl Market.

In su litzeu “De Castro” custu mangianu si faghet sa Die de sa Memòria pro sas vìtimas de sas màfias. Ant a èssere presentes su referente de Libera pro sa Sardigna Giampiero Farru e Claudia Loi, sorre de Emanuela Loi.

Fogu, dantza e ologrammas in mesu de sos repertos, cras sero in su museu tzìvicu Santeru de Santeru cun s’ispetàculu “Il Soffio di Prometeo”.
Dae Santa Justa a Monte Arci “In cammino con Mary”: cras mangianu sa de 4 editziones de sa passigiada dedicada a fàghere a cumprèndere mègius sa salude mentale.

In Cùglieri, custa coa de chida si podet ancora visitare sa mustra chi presentat sos ritos de Chida Santa, in su seminàriu pontifìtziu betzu. Cras in sa crèsia parrochiale de Milis s’espositzione de sos traballos de risanamentu e su cuntzertu de su coro parrochiale de Milis e Narabuìa, de su coro La Vega de Milis e de su coro Studium Canticum de Casteddu.

In Bilartzi, custu sero in domo Badalotti sa presentada de su libru “L’aneddoto… Una storia, tante storie” cun Paolo Oggianu e su coronellu de sos Carabineris Luciano Gavelli.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.