Dies de cuntrastos polìticos pro su Comune de Aristanis

Novas Aristanesas, martis 17 de martzu de su 2026

Su Cussìgiu comunale de Aristanis s’aprontat a torrare a s’àula pro aprovare su bilàntziu de previsione 2026-2028, passàgiu de importu pro su tempus chi at a bènnere de sa giunta noa ghiada dae su sìndigu Massimiliano Sanna. Sa seduta, in programma giòbia 19 de martzu, arribat a pustis de chidas de cuntrastos polìticos chi ant cambiadu s’istabilidade de sa magioràntzia de tzentru-destra e custrintu su primu tzitadinu a torrare a pònnere manu a sa cumpositzione de sa giunta.

Sa crisi s’est cuncretizada cun s’azeramentu de s’esecutivu detzisu dae su sìndigu Sanna a pustis de su rinviu de unu cussìgiu comunale pro mancàntzia de su nùmeru legale, ca bi mancaiant giai totu sos cussigeris de magioràntzia. Unu fatu chi at cunfirmadu sa segada in intro de sa coalitzione. A sa base de sa briga, sos cuntrastos in contu de sa gestione de unos cantos sèberos amministrativos e sa rechesta de sostituire s’assessore Ivano Cuccu, chi at fatu partire una filera de reatziones finida cun sa bessida dae sa magioràntzia de su grupu Oristano al Centro.

A pustis de dies de tratativas, Sanna su 5 de martzu passadu at nominadu una giunta noa, cumposta dae Maria Bonaria Zedda, Simone Prevete, Valentina De Seneen, Antonio Franceschi, Giulia Murgia e Gianfranco Licheri, lassende·si tantas dèlegas e aberende in su matessi tempus a su diàlogu cun Sardegna al Centro 20Venti pro garantire istabilidade in s’ùrtimu annu de mandatu.

Sa cumpositzione noa no at firmadu sas polèmicas: dae sos ex alleados sunt arribadas acusas in contu de sa gestione polìtica de sa crisi, mentres su sìndigu at respintu sos atacos faeddende de sèberos pretzisos pro evitare su blocu amministrativu.

Su votu pro su bilàntziu rapresentat como su bancu de prova: s’at a cumprèndere si sa magioràntzia noa at a resurtare a rèzere finas a s’acabu de su mandatu o si s’iscena polìtica aristanesa at a abarrare signada dae s’instabilidade.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.