A sa provìntzia de Aristanis l’agradat a giogare a iscacos

Novas Aristanesas, martis 24 de martzu de su 2026

A sa provìntzia de Aristanis l’agradat a giogare a iscacos – Sos iscacos sunt leende semper prus logu in provìntzia de Aristanis. Intre resurtados isportivos de importu, atividades in sas iscolas e tzìrculos ativos in logos meda de su territòriu, su mundu de sos iscacos paret chi siat diventende unu de sos campos de isfida prus sighidos, a manera particulare dae sos giòvanos de sa provìntzia.

Su resurtadu prus de importu benit dae su tzìrculu Oristano Scacchi, cun sede in carrera Diego Contini, protagonista de una dòpia promotzione, chi non si fiat bida mai, in su Campionadu italianu a iscuadras chi s’est fatu dae pagu tempus in Tàtari.

Sa formatzione de Oristano Scacchi at conchistadu s’intrada a sa sèrie A2, mentres una segunda iscuadra at bìnchidu su torneu de Promotzione conchistende sa sèrie C. Unu traguardu istòricu pro su club, frutu de sos allenamentos e de unu clima de passione chi at interessadu totu sos sòtzios.

In su campionadu a iscuadras ogni incontru si giogat in bator iscachieras e su resurtadu finale est sa summa de sas partidas individuales, e custu mustrat chi fintzas sos iscacos podent èssere un’isport de iscuadra a beru.Sa passione pro sos iscacos imbatet puru a sas iscolas. In su Trofeo Scacchi Scuola, fatu a primos de martzu in s’ITIS “Othoca” de Aristanis, sos istudiantes de s’Istitutu cumprensivu de Terraba ant conchistadu pòdios meda e s’intrada a sa fase regionale, pro more de unu progetu fatu pro annos meda cun costàntzia e partetzipatzione. Resurtados bonos meda fintzas pro s’ Istitutu Cumprensivu de Marrùbiu, chi at otentu unu primu, unu segundu e unu tertzu postu, cunfirmende su valore educativu de una disciplina chi allenat lògica, cuntzentratzione e capatzidade de ragionamentu.

In provìntzia, b’at tantos tzìrculos frecuentados dae apassionados de ogni edade. In prus de Oristano Scacchi, sunt ativos puru su tzìrculu Red Tal de Marrùbiu, in pratza Roma, e su Chessmates de Terraba cun sede in carrera Marceddì.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.