Una coa de chida de eventos in sa provìntzia de Aristanis
13 Febbraio 2026
Novas Aristanesas, chenàbura 13 de freàrgiu de su 2026
Una coa de chida de eventos in sa provìntzia de Aristanis – Ària de carrasegare in su cabu de logu. Mùsica, ballos, folclore e traditzione in sos eventos collegados a sa Sartìllia. Custu sero in pratza Lionora b’at a èssere su grupu Folk Tzitade de Aristanis; cras sero in antis unu cunvegnu pro faeddare de s’Alka in s’Hospitalis Sancti Antoni, poi s’inauguratzione de su “Villàgiu Sartìllia” in pratza Cova e sa Prima de Su Bandu cun s’isfilada in tzentru de sos tamburinos de sa Pro Loco e sas delegatziones istòricas de Feltre, Asti e de su Calcio Storico Fiorentino. Serrat su Sartiglia in Fest in pratza Roma. S’incràs mangianu, sa Sartìllia de su Grèmiu de sos Massajos. Gustu e divertimentu finas in su Tzentru cummertziale Porta Nuova sàbadu a merie cun sas tzìpulas.
Biàgiu intre mùsica, poesia e memòria cras sero in Santu Lussurzu pro Santu Valentinu cun sa Fundatzione Hymnos, imbetzes domìniga comintzat sa Carrela ‘e Nanti, una de sas manifestatziones ecuestres prus antigas e identitàrias de s’Ìsula.
In Sèdilo, domìniga a merie intre su Cursu Lionora e pratza Reina Margherita si faghet Su Puddu, sa cursa traditzionale a caddu e a pustis ballos e tzìpulas pro totus.
Sàbadu mangianu comintzat Su Mattisi de Coa in Terraba cun su primu apuntamentu pro sos pitzinnos de iscola, cun s’isfilada de sas mascareddas e s’ispetàculu Gaspar Show in pratza Caduti sul lavoro.
In Arcidanu, sàbadu comintzat sa 2° editzione de su Carrasegare Arcidanesu e s’isfilada de sos carros allegòricos.
Non carrasegare ebbia: in sa biblioteca comunale de Simaghis custu merie Claudia Musiu presentat su romanzu suo “Cosa resta di me”, chistionende cun Rossana Ortu. Cras sero, imbetzes, laboratòrios, arte, dantza e mùsica in su Tzentru sotziale cun su Global Movement to Gaza Sardegna pro sa campagna natzionale 100×100 Gaza.
In ùrtimu, custu sero in Norghiddo sa rassigna de cantu a tenore in sa biblioteca comunale pro su progetu Amparu.
Gianfranca Piras
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.