Sos ritos de sa Chida Santa in provìntzia de Aristanis
24 Febbraio 2026
Novas Aristanesas, martis 24 de freàrgiu de su 2026
In provìntzia de Aristanis puru sa Chida Santa rapresentat unu de sos momentos prus fortes de s’annu litùrgicu. Sas prutissiones e sos ritos chi si faghent in sas tzitades e in sas biddas ammentant sa Passione, Morte e Resurretzione De Gesùs Cristu, interessende totu sa comunidade. Sa traditzione, tramandada dae generatziones, aunit a pare elementos religiosos, sìmbulos antigos ma fintzas influèntzias ibèricas.
In Aristanis, a pustis de sa Domìniga de Pramma, si faghet sa prutissione de “Is Mistèrius” in sas carreras de su tzentru istòricu cun istàtuas e sìmbulos de sos mistèrios de sa Passione. Sa Giòbia Santa est dedicada a sa Missa in Coena Domini, a su ritu de samunare sos pees e a sa prutissione de “Su Jesus” cun vìsita a sos Sepulcros. Sa Chenàbura Santa si faghet sa prutissione de “Sa Maria” e sa funtzione de Su Scravamentu, e a pustis sa prutissione de “S’interru”. Sa Domìniga de Pasca finit cun sa prutissione de “S’incontru” tra su Cristu Risortu e Nostra Sennora.
In sas biddas de Montiferru, comente Cùglieri e Santu Lussùrgiu, sos ritos sunt particulares meda. In Cùglieri, chimbe cunfradias organizant sas tzelebratziones, e in intro de custas sa chirca simbòlica de Gesùs (Sas Chilcas), s’adoratzione de sos Sepulcros, sa funtzione de S’Incravamentu (su ritu de pònnere a Deus in sa rughe) e cussu de S’Iscravamentu. Significativa sa beneditzione de sos matzuleddos de violetas e frores de aràngiu sa die de Pasca, chi si portant in prutissione cun su crutzifissu.
In Santu Lussùrgiu e in Iscanu, sas tzelebratziones sunt impretziosidas dae sos càntigos polifònicos a cuncordu, Stabat Mater e Miserere, ammentende atmosferas de devotzione manna. Su Sàbadu Santu si preparant su Cristos Risortu e Nostra Sennora isetende su mangianu de Pasca, cando si faghet S’Incontru, sìmbulu de sa Resurretzione e de s’isperàntzia.
Maria Giovanna Serchisu
Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.