Sos eventos de sa coa de chida in provìntzia de Aristanis

Novas Aristanesas, chenàbura 20 de freàrgiu de su 2026

Sos eventos de sa coa de chida in provìntzia de Aristanis – S’àera de carrasegare at a dare ancora briu a sa coa de chida in provìntzia de Aristanis.

In Marrùbiu, mancat semper prus pagu tempus a s’isfilada regionale manna de Su Marrulleri de domìniga a merie, ma in antis b’at tantos eventos: oe a merie b’est su Gran Galà de su Giudicadu in sa chentina Quarto Moro, imbetzes cras s’at a pòdere bisitare, prenotende in antis, su casufìtziu Mùrgia, e a de note in sa palestra de carrera Tirsu s’at a fàghere sa Padedda e sos ballos de Carrasegare.

In Sabarussa cras a merie torrat s’isfilada traditzionale pro sa de 31 editziones de Su Bingiatteri, e a pustis sa padedda cun mùsica e divertimentu pro totus.

Finale maestosu poi pro su Carrasegare de Ollasta, cun sa Padedda de cras a merie in pratza Santu Sebastianu, e a pustis tzìpulas e garnatza, sena contare ballos e càntigos cun su triu “A ballare”.

In Aristanis, a pustis chi l’ant transida pro su tempus malu, domìniga a merie in su bighinadu de Su Brugu b’at a èssere sa Sartill’e canna, torneu dedicadu a sos prus piticos, capitanada dae Pietro Filippo Orrù, cun Alice Muresu (segundu) e Giovanni Greggiu (tertzu).

Non carrasegare ebbia: custu sero in su Museu diotzesanu pro sa sèrie de atopos “I Pomeriggi del Romanico 2026” de s’assòtziu Amici del Romanico b’at a èssere sa cunferèntzia “Musica visibilis” a incuru de Agostina Meloni. Cras sero, imbetzes, pro sa rassigna de su Cedac, in su Teatru Garau si rapresentat “La moglie fantasma” de David Tristram.

E a pustis, comente si usat a fàghere una chida a pustis de sa Sartìllia, domìniga mangianu torrat sa de 12 editziones de sa Mesa Maratona intre Aristanis e Turre Manna. S’apuntamentu, organizadu dae Dinamica Sardegna, intrat in su calendàriu de Fidal Sardegna e Csen.

In ùrtimu, oe e cras sa Fundatzione Pinuccio Sciola partètzipat a su segundu fine de chida de sas Dies de progetatzione condivìdida programmadu in Sèneghe.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.