Sa provìntzia de Aristanis amparat sos betzos dae sas trampas

Novas Aristanesas, martis 3 de freàrgiu de su 2026

Su de las prevènnere est sa mègius cosa contra a sas trampas, semper prus sofisticadas, chi ferint mescamente a sos betzos, in manera particulare a chie istat solu, isfrutende sa fidùtzia e sa timòria.

Non tocat de abèrrere a gente disconnota, non tocat de si fidare de rechestas improvisas de dinari e tocat de cuntatare luego sas fortzas de s’òrdine; custas sunt sas primas cosas prudentes de fàghere. Bortas meda sas trampas sighint sos matessi copiones fatos àteras bortas: dae sos tècnicos o dipendentes farsos de entes pùbblicos, finas a sas trampas fatas in telèfono faghende sa finta de èssere carabineris chi sunt chirchende dinari pro fàghere a manera chi sos fìgios non tèngiant problemas cun sa giustìtzia.

Pro firmare custas cosas, su 26 de ghennàrgiu passadu in Aristanis in Prefetura ant firmadu unu protocollo de intesa intre su prefetu Salvatore Angieri e su sìndigu Massimiliano Sanna, e in antis ant fatu un’addòbiu de su Comitadu provintziale pro s’òrdine e sa seguresa pùbblica, e a custu b’ant leadu parte fintzas sas autoridades de sa provìntzia de sas fortzas de s’òrdine e su presidente de sa Provìntzia Paolo Pireddu. S’acordu afòrtigat su traballare paris tra istitutziones e sustenet sas atziones pro prevènnere trampas fatas in telèfono, in computer e peri sas domos.

A custu propòsitu, semper in Aristanis, est torradu a partire su progetu “Non farti beffare!”, promòvidu dae su Comune paris cun sa Prefetura e gestidu dae sa Cooperativa Sotziale Passaparola.

Sos chi tenent prus de 65 annos, chi rapresentant su 28,4% de sa populatzione, sunt espostos meda a dannos econòmicos e psicològicos comente ànsia, timòria e isulamentu. Su progetu previdet mesas de informu in sas pratzas, addòbios formativos pro operadores e momentos de cunfrontu dedicados a sos betzos. Est ativu fintzas un’isportellu, chi non si pagat nudda, de agiudu psicològicu e orientamentu, ogni martis de freàrgiu e martzu dae sas tres a sas chimbe (h 15 – 17), in carrera Sardegna 57, pro gente chi at tentu trampas e pro sos familiares, e in ie los iscurtant, lis dant informos e agiudos cuncretos pro lis torrare seguresa e serenidade.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.