Sa Die mundiale de su gatu

Novas Aristanesas, martis 17 de freàrgiu de su 2026

Sa Die mundiale de su gatu – In Itàlia su mese de freàrgiu tzèlebrat sos gatos, mescamente su 17, data de sa Die natzionale de su gatu. Un’ocasione chi serbit pro superare ideas chena fundamentu e pregiudìtzios, festende non solu sos gatos de domo ma fintzas cussos chi vivent lìberos in sas colònias felinas. Una realidade presente in sa provìntzia de Aristanis, in ue sos gatos rapresentant unu patrimòniu de istima e sotziale.

Segundu sos datos prus reghentes riferidos a su 2025, in sa provìntzia de Aristanis b’at 74 colònias, chi s’agatant mescamente in su cabu-logu ma fintzas in Ales, Terraba, Marrùbiu e Bosa.

Unu nùmeru chi mustrat s’impignu de ogni die de s’Asl 5 de Aristanis, paris cun comunes e assòtzios. Isterilizatziones, controllos sanitàrios e igiene sunt mèdios de fundamentu pro garantire su bene istare de sos animales e sa cunvivèntzia in sas biddas.

“Pro colònia felina s’intendet unu grupu de gatos chi vivent a manera agreste in logos determinados e identificados dae su Comune de riferimentu”, at naradu Giuseppe Sedda, responsàbile de su Servìtziu Anàgrafe Canina, Randagismu e Igiene Urbana. Paràulas chi marcant su valore de unu sistema reguladu e tuteladu dae sa norma.

Intre sas esperièntzias prus connotas ispicat s’òasi “Gli A-Mici del cimitero” de Terraba, nàschida dae abbandonos e oe sustènnida dae volontàrias e volontàrios. Inoghe, intre domitas e curas de sos veterinàrios, deghinas de gatos agatant amparu pro more de s’interessamentu de referentes e tutor.

Famada fintzas sa colònia de Su Pallosu, in sa marina de Santeru, sa connota Spiaggia dei Gatti. In custu chigione de mare cristallinu vivent paris natura, archeologia e rispetu pro sos animales. Sas vìsitas ghiadas, a incuru de s’Assòtziu culturale Amici di Su Pallosu, faeddant de unu modellu virtuosu de amparu e avaloramentu de su territòriu e de sos gatos chi istant in ie.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.