Poltronas in donu a s’ispidale “Santu Martinu” de Aristanis

Novas Aristanesas, martis 10 de freàrgiu de su 2026

Poltronas in donu a s’ispidale “Santu Martinu” de Aristanis – In s’ispidale “Santu Martinu” de Aristanis duos atos de solidariedade ant megioradu s’istare bene de sos ricoverados e sa calidade de s’assistèntzia in duos repartos dìligos meda.

Ses poltronas motorizadas sunt istadas donadas dae s’assòtziu “Thalassa Azione” a su repartu de Microtzitemias, pro rèndere prus de cunfortu sas oras meda chi sos malàidos talassèmicos bi devent istare cando faghent sas trasfusiones.

Sas poltronas, chi portant mecanismos “alza-persona” e chi si podent istèrrere giai comente letos, sunt adatas pro sas esigèntzias cuncretas de sos malàidos. “Ogni malàidu benit a inoghe in mèdia ogni bìndighi dies pro sas trasfusiones: tenet bisòngiu de istare còmodu. Custos agiudos noos bi l’ant a permìtere”, at naradu su diretore de su repartu Mauro Murgia. Unu ringratziamentu est lòmpidu puru dae sa diretora generale de sa Asl 5, Grazia Cattina chi at naradu chi custu gestu est “una dimustratzione in prus chi cando b’at una rete de collaboratzione cun su mundu de su voluntariadu e su de tres setores, nde tenent benefìtziu fintzas sos servìtzios sanitàrios in contu de assistèntzia e calidade”.

Fintzas su repartu de Pediatria at retzidu duas poltronas letu pro permìtere a sos genitores de istare a canta a sos pitzinnos ricoverados. Las ant cunsignadas su 20 de ghennàrgiu sos Donatorinati de sa Politzia de Istadu, rapresentada dae su vitze-presidente regionale Daniele Rocchi, cun Manuela Fa.

Custu gestu s’est fatu pro more de una rete solidale manna chi at interessadu famìllias, assòtzios isportivos e realidades de su territòriu. Sas duas poltronas s’agiunghent a sas primas duas donadas carchi annu a como a su repartu dae s’assòtziu de politzia.
Paràulas de gratitùdine sunt imbàtidas dae sa dirigente de su repartu, Enrica Paderi, e dae sa diretzione generale de sa Asl 5, chi ant ammentadu sos sinnos meda de vitzinàntzia retzidos dae su repartu de Pediatria in su tempus de sas festas de Nadale.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.