Is giòvanos protagonistas de unu muntone de addòbios e fainas 

Novas Aristanesas, giòbia 5 de freàrgiu de su 2026

In provìntzia de Aristanis is giòvanos sunt protagonistas de una filera longa de fainas e progetos. Dae su programma “Isperdemus-nos II – Nuos de tempus benidore” a is “Dies de co-progetatzione” de Sèneghe, fintzas a su progetu nou “Còdighe” presentadu in Crabas, s’atentu est pro favorèssere sa crèschida de is giòvanos, sa partetzipatzione e sa cussèntzia digitale.

In Crabas est cumentzadu “Còdighe – Cumpetèntzias digitales pro s’annoadura, sa cussèntzia e s’ètica”, cuncordadu dae su Comune e finantziadu cun 25.000 èuros dae sa Fundatzione de Sardigna.

Su progetu, fatu cun Sp Resursar Umanas e cun s’Istitutu cumprensivu de Crabas e cun s’Istitutu tècnicu “Lorenzo Mossa” de Aristanis, oferit àndalas pro istudiantes, insegnantes e babbos e mamas in contu de is temas de sa tzitadinàntzia digitale, de sa barra e de s’iscòcoro prus che totu in lìnia e de s’isvilupu de cumpetèntzias in is relatas. Intra de is fainas si prevident cursos de Peer&Media Education, laboratòrios de su istare bene digitale, addòbios de fotografia e àndalas de imparu pro mannos in contu de educatzione digitale e educatzione a is emotziones.

In Sèneghe, imbetzes, ddoe cuncordant unu laboratòriu ispartu de annoadura culturale, cun is Dies de co-progetatzione de is logos chi proponent a is giòvanos, imprendidores e chi bolent progetare un’àndala pràtica pro pensare a progetos chi parent fronte a is bisòngios de sa bidda. Sa metodologia ponet paris Design Thinking e cultura sarda, movende dae is fainas de grandos artistas de su logu, cun sessiones in presèntzia e in lìnia, laboratòrios, prototipatzione e unu Demo Day de acabbu.

In fines, cun “Isperdemus-nos II – Nuos de tempus benidore”, sa Provìntzia de Aristanis afòrtigat su rolu suo de regia territoriale de is polìticas pro is giòvanos. Su programma at a tènnere dura de 18 meses e at a ofèrrere isportellos de ascurtu psicològicu, àndalas de educatzione sòtziu-afetiva, fainas isportivas e iscutas de sensibilizatzione, avalorende su protagonismu de is pitzocheddas/os cun laboratòrios, addòbios e oportunidades de mobilidade europea.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.