In provìntzia de Aristanis si festant sos binchidores de su Carrasegare

Novas Aristanesas, chenàbura 27 de freàrgiu de su 2026

In provìntzia de Aristanis si festant sos binchidores de su Carrasegare – Sos carrasegares de sa provìntzia de Aristanis serrant sos sipàrios festende sos binchidores.

In Santu Lussurzu, Sa Carrela ‘e Nanti at premiadu comente màscaras prus bellas Alessandro Mura e Davide Ruiu, a pustis Andrea Meloni e Francesco Chessa; a su de tres postos Francesco e Enzo Campus. Tzocamanos pro Chiccu Motzo, cadderi su prus espertu, protagonista in abertura e serrada cun sa “pareza ‘e tres” de sa traditzione. Pro su Lunis de sa pudda at bìnchidu Giuseppe Piu, sighidu dae Gabriele Ledda; a su de tres postos Giovanni Motzo a pustis de tiradura a sorte. Premiados finas sos noitzolos Gabriele Sechi e Francesco Scano e reconnoschimentu ispetziale a Chicco Mele.

In Aristanis sa giuria de sa Sartìllia 2026 at assignadu su Prèmiu Enrico Fiori a Andrea Concas, Antonella Rosa e Federico Misura (Costùmenes Sardos) e a Ilaria Rosa, Sonia Cadeddu e Giorgia Madeddu (Costùmenes Ispagnolos). Domìniga Federico Fenu at conchistadu sa mègius calada a s’isteddu; primu postu pro sas evolutziones a su triu Andrea Concas-Antonella Rosa-Federico Misura. Pro su martis, imbetzes, sa mègius calada est pro Sergio Ledda, imbetzes pro sas evolutziones su pòdiu est tocadu a Alessio Garau-Gianluca Russo-Alberto Musu. Pro sos Prèmios ispetziales isteddos de prata a Federico Fenu e Sergio Ledda, e isteddu de oro a Giampaolo Mugheddu.

In Marrùbiu, Su Marrulleri at incoronadu su Magic Group de Terraba cun “La Rebelión del Toro”, sighidos dae su Magic Group de Terraba, dae su grupu Storpions de Terraba cun “Il Re Scorpione” e dae su Galaxy Team de Marrùbiu cun “No Me Moleste Mosquito”. Intre sos carros de segunda categoria at triunfadu La Goccia de Marrùbiu cun “Goldrake”.

In ùrtimu, in Terraba, pro Su Mattisi de Coa, ant triunfadu sos New Storpions de Terraba, sighidos pro su segundu postu dae su grupu de Terraba Magic cun su carru a tema corrida, e pro su de tres dae su grupu de Santu ‘Èngiu Fibra Ottica cun su carru numenadu Around the world.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.