In Aristanis e Bosa aumentant sas tassas de sogiorno

Novas Aristanesas, mèrcuris 11 de freàrgiu de su 2026

In Aristanis e Bosa aumentant sas tassas de sogiorno – Novidades pro sos turistas chi ant a visitare Aristanis e Bosa: ambas duas ant agiornadu sas tarifas de s’imposta de sogiorno pro su 2026.

Sa Giunta comunale de Aristanis, cun delìbera n.3 de su 12 de ghennàrgiu, at aprovadu unu pianu tarifàriu nou cun un’aumentu de sos prètzios in cunfrontu a sas tarifas in vigore dae su 2019. Sa punna est de agiudare su setore de su turismu, megiorare sos servìtzios pùbblicos e garantire sa manutentzione de sos benes culturales.

Dae sa prima die de martzu de su 2026 sas tarifas noas ant a èssere aplicadas a totu sas istruturas chi retzint gente: pro sos hotel 4 isteddos o superiores sa tarifa passat dae 2 a 3 èuros a persone pro note; pro sos hotel 3 isteddos o inferiores dae 1,50 a 2 èuros. Pro sas istruturas extra-alberghieras e logos chi afitant a turistas, comente B&B e domos privadas, s’imposta nche pigat dae 1 a 1,50 èuros, mentres in sos logos in ue firmant sos camper e in logos de retzire in foras sa cuota addòpiat, passende dae 0,50 a 1 èuro. Abarrant in vigore sas esentziones e sas agevolatziones prevididas dae su regulamentu comunale.

In Bosa, s’agiornamentu de sas tarifas sighit su matessi printzìpiu e mirat a garantire servìtzios adeguados in s’istasione de su turismu. S’amministratzione comunale ponet in craru chi s’imposta permitit de finantziare pulitzia de sa tzitade, regorta de s’arga, manutentzione de istradas e percursos turìsticos, e avaloramentu de su patrimòniu culturale, faghende a manera chi custas ispesas non siant a càrrigu ebbia de sos residentes. Una parte de s’intrada prus manna, prus o mancu su 30%, at a èssere destinada a fundos istatales, reduende sas resursas disponìbiles in su logu.

Sa tassa de sogiorno est unu tributu locale chi pesat subra sos chi andant a sas istruturas chi retzint gente e est unu de sos pagos istrumentos de autonomia fiscale de sos comunes italianos. Sa normativa permitit una personalizatzione de sas tarifas, de sas esentziones e de sas iscadèntzias, tenende contu de sas particularidades turìsticas e de sas esigèntzias de ogni territòriu.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.