Carrasegare, natura e libros: sa coa de chida in provìntzia de Aristanis

Novas Aristanesas, chenàbura 6 de freàrgiu de su 2026

Carrasegare, natura e libros: sa coa de chida in provìntzia de Aristanis – Intre ritos e traditziones, su carrasegare est semper prus a curtzu. In fatu, sos eventos de sa coa de chida in provìntzia de Aristanis.

Domìniga comintzat sa de 29 editziones de A Maimone a incuru de s’Assòtziu culturale Mamutzones de Samugheo, in ue ant a isfilare sas màscaras traditzionales de su carrasegare sardu ma finas duos grupos de Continente.

Finas in Santu Lussurzu b’at isetu mannu pro sa prima die de cursa de sa caraterìstica Carrela ‘e Nanti de domìniga, ma in antis – o e cras – b’est Càntigos in Carrela 2026 cun sos cantadores de su Cuncordu Lussurzesu e cun sos coros òspites peri sas carreras de sa bidda. E poi ancora, in pratza Ìtria in Paulle cras a merie b’est s’isfilada manna pro Atòbios de carrasegae e domìniga in Bilartzi su carrasegare traditzionale cun su Carruzu a s’antiga.

In Aristanis comintzant sas tantas manifestatziones chi andant paris cun sa Sartìllia: custu sero ballos sardos in pratza Manno cun Vanni Màsala, cras sero in sa crèsia de Santu Domìnigu Sa Sartìllia de is Froris e domìniga mangianu sa beneditzione de sos cadderis de sa Sartìllia in pratza Santu Efis e a pustis sa Sartìllia de Canna. A sero, in su Teatru Garau, su Gran Galà de sa Sartìllia. E custu sero, semper in teatru, s’ammentu de Gigi Riva pro sa rassigna teatrale de su Cedac. Ària de carrasegare finas in Porta Nuova, cras a merie, cun su Carnival Party pro sos prus minores. In ùrtimu, in tzitade, est protagonista finas s’atividade natatòria cun sa prima editzione de su Trofeu Tzitade de Aristanis, cras e domìniga in Sa Rodia.

Logu a sa cultura, custu sero, in su tzentru polivalente de Crabas, cun Francesco Abate chi presentat s’ùrtimu romanzu suo, “Gli indegni”.

In ùrtimu, intre cras e domìniga, ancora eventos meda in zona de Terraba pro sa Die mundiale de sos logos ùmidos intre initziativas e bìsitas a sa Turre de Marceddì, a su setore de pisca Niedditas e a sa laguna de S’Ena Arrùbia in Arborea.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.