Aristanis afestat a Santa Maria de Candelas

Novas Aristanesas, lunis 2 de freàrgiu de su 2026

Cun s’arribbu de Santa Maria de Candelas, Aristanis s’acostat semper de prus a sa Sartìllia, cun totu sa tzitade chi cumentzat su contu a s’imbesse. Custu mangianu ant cunsignadu is chìrios beneitos a is cadderis, marchende aici s’intrada ufitziale in sa simana de sa currera, in programma domìnigu 15 e martis 17 de freàrgiu.

Su ritu de su Carrasegare, chi torrat paris cun sa festa de sa Presentada de Gesùs in su Tèmpiu, previdet chi is Grèmios de is Massajos e de is Maistros de Linna presentent a sa comunidade is cumponidores chi ant a ghiare sa currera a caddu.

Pro su Grèmiu de is Massajos, ghiadu dae s’oberaju majore Tore Carta, sa die de Santa Maria de Candelas est cumentzada a is 7 in sa crèsia de Santu Giuanne de Frores cun sa missa fata dae para Gianluca Longobardi. A mangianu tardu su chìriu beneitu dd’ant cunsignadu a su cumponidore Daniele Mattu e a is cumpàngios suos de parìllia Cristian Sarais e Andrea Solinas.

A is 8.30, in sa Sea, ddoe est addòbiadu imbetzes su Grèmiu de is Maistros de Linna. Sa missa dd’at fata munsennore Tonino Zedda chi at fintzas beneitu is chìrios in sa capella de Santu Giusepe.

A pustis, su majorale en cabo Carlo Pisanu at cunsignadu su chìriu a su cumponidore Graziano Pala, cun a costàgiu Marco Arca e Cristian Matzutzi. Ma is chìrios ddos ant donados fintzas a autoridades, a viudas e viudos de is sòtzios mortos, a cunfrades malàidos e a àteros amigos de is Grèmios, in un’iscuta de emotzione manna.

Ma est istada una die de importu fintzas pro is prus piticos. Sa Sartilliedda puru, ghiada dae su cumponidoreddu Gabriele Piras cun Francesco Tumbarello e Matteo Carta, at afestadu a Santa Maria de Candelas cun sa missa fata in sa crèsia de Santu Efis dae munsennore Alessandro Floris e cun sa cunsigna de is chìrios beneitos dae parte de sa Pro Loco, ghiada dae Ilaria Canu, prima presidente fèmina de s’assòtziu de promovimentu turìsticu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.