Abbiatzamentu de s’aeroportu de Fenosu (Iscola de bòlidu e Airidea)

Novas Aristanesas, mèrcuris 25 de freàrgiu de su 2026

Abbiatzamentu de s’aeroportu de Fenosu (Iscola de bòlidu e Airidea) – S’aeroportu de Fenosu, in fines, diat pòdere torrare a abèrrere a pustis de annos chi fiat firmu. Sa Sogeaor, sotziedade privada chi gestit s’iscalu, s’est candidada pro acasagiare s’iscola de bòlidu italiana de ITA Airways. Unu sèberu istratègicu chi, pro s’amministradore Riccardo Faticoni, bolet “sa mobilitatzione de totu is istitutziones regionales, de s’Enac, de is entes locales, de is assòtzios de impresa e de is rapresentantes de su mundu de sa formatzione, pro chi si movant paris”. Sa punna est sa de “presentare una candidadura a cumone chi avaloret Aristanis-Fenosu comente a sea bona pro su progetu de ITA Airways”.

S’iscola diat formare a pilotas e tècnicos segundu istandard internatzionales, cun crèschida de s’ocupatzione pro is giòvanos e profetu mannu pro is impresas de su logu. “Sa nàschida de un’iscola de primore diat dare un’ispinta manna a s’economia locale e regionale”, narat Faticoni, regordende is infrastruturas chi giai s’agatant in s’aeroportu. Fintzas su presidente de sa Provìntzia, Paolo Pireddu, at bogadu un’apellu pro s’unidade. “Est un’investimentu pro su tempus benidore de is logos nostros e un’ocasione pro ofèrrere iscenàrios noos de crèschida a totu sa Sardigna”.

Sa Cisl de Aristanis at torradu a sutaliniare su bisòngiu de “unu caminu cumpartzidu chi pòngiat paris istitutziones, mundu produsidore e fortzas sotziales”, mentras su consigieri regionale Alessandro Solinas (Movimentu Chimbe Isteddos) regordat chi s’aeroportu, in is ùrtimos noe annos, est abarradu firmu, cun s’arriscu de andare in ruina e de pèrdere su potentziale.

Ma s’abbiatzamentu de s’aeroportu si diat pòdere otènnere fintzas cun sa cumpangia noa Airidea, chi tenet sa sea sua in Gènova, chi at postu Fenosu in su pranu suo de collegamentos pro s’istadiale intra de Sardigna, Còrsica e Nord-Ovest de Itàlia. Su pranu previdet bòlidos cara a aeroportos piticheddos, pro megiorare is trasportos de is logos perifèricos. Sa Sogeaor, chi at retzidu sa proposta, est abetende is autorizatziones de s’Enac.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.