Unu cumentzu de annu abbiatzadu dae addòbios meda in provìntzia de Aristanis

Novas Aristanesas, sàbadu 3 de ghennàrgiu de su 2026

Sunt medas is addòbios in custa coa de chida in provìntzia de Aristanis. Comintzamus cun s’arte: sighit sa mustra “Intritzos ispantosos peri is Bias de sa Seda. Tessìngiu dae s’Àsia de Mesu e dae sa Tzina” cuncordada in su MURATS de Samugheo e sa mustra de su “Turnu de sa bia de is Congiolàrgios” acasagiada in su Palàtziu de is Arcais, in Aristanis.

Semper in Aristanis, is mòngias crarissas ant aparitzadu unu calendàriu ricu de tzelebratziones religiosas in sa crèsia de Santa Crara, cun missas in programma oe puru e fintzas a sa Pasca de is Tres Rees.

Sa banda musicale “Giuseppe Verdi” de Terraba donat su bene bènnidu a s’annu nou cun sa mùsica sonada in presèntzia e unu cuntzertu ispetziale custu merie in su teatru comunale. A su cuntzertu ddoe pigant parte fintzas sa banda “Tzitade de Sàrdara” e sa banda “Tzitade de Biddacidru”. In Terraba etotu, cras ddoe faghent sa de duas editziones de su mercadeddu de is pipios e de is pitzocheddos, una faina cuncordada dae su bighinadu “Domus bècias" in ue is protagonistas ant a èssere is pipios e is mesìllias issoro cun gioghitos, immagineddas, libros e àteros trastes.

E, sigomente est sa coa de chida in antis de sa Pasca de is Tres Rees, Sèdilo s’aprontat pro acasagiare sa Befana cun unas cantas fainas: lunis a merie cun su giru de is presèpios peri is bias de sa bidda e, a meritzeddu, cun su cuntzertu in sa crèsia de Santa Rughe de is coros de Sèneghe e Paulle e, pro serrare, cun sa premiatzione de is mègius presèpios. In fines, pro sa Pasca de is Tres Rees, “Totus cun su nasu cara a susu”, cun sa Befana chi nd’at a calare dae su campanile.

In fines, faeddende ancoras de sa Pasca de is Tres Rees, in Abbasanta ddoe faghent “Abetende sa Befana”, lunis a merie, cun una passigiada chi at a mòvere dae pratza de Istatzione e at a lòmpere fintzas a pratza de sa Bìnchida, in ue ddoe ant a fàghere giogos, istentos e ddoe at a sonare sa banda musicale “Tzitade de Macumere” e cun s’arribu de sa Befana.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.