Un’artìculu in limba sarda, ònnia die cun is novas de sa provìntzia de Aristanis

Novas Aristanesas, chenàbura 2 de ghennàrgiu de su 2026

Dae oe su giornale nostru acasàgiat torra una parte dedicada a sa limba sarda. Ddu faghet torrende a propònnere sa rubrica “Novas Aristanesas”. Un’apuntamentu chi, ònnia die, dae su lunis a su sàbadu, bos at a acumpangiare in totu custu 2026 apenas comintzadu, a totu annu. At a èssere un’artìculu de informu in contu de chistiones de atualidade, crònaca, economia, ambiente, isport, istòria, ispetàculu e cultura de sa provìntzia de Aristanis. Is iscritos ant a èssere totu in sardu e ddos ais a pòdere lèghere inoghe, in OristanoNoi.

Una ventanedda de s’artìculu s’at a pòdere bìere in sa parte arta de sa pàgina de abertura, sa home page, e totu is artìculos s’ant a pòdere agatare in sa setzione cuncordada a s’aposta e a ue s’at a pòdere intrare dae sa pàgina printzipale etotu. Ma is artìculos, ònnia die, ddos ais a pòdere agatare fintzas in is prataformas social nostras.

In redatzione m’ant a fàghere cumpangia duas collegas espertas de limba sarda e chi dae prus de 20 annos contivìgiant unu muntone mannu de fainas pro s’isparghidura e s’avaloramentu de sa limba istòricu-identitària nostra: Zuanna Frantzisca Piras e Maria Zuanna Serchisu.

Su progetu editoriale nou gosat de s’agiudu de s’Assessoradu de s’Istrutzione pùblica de sa Regione Sardigna, chi dd’at cunsideradu intra de is progetos chi meressiat a ddos incoragire gràtzias a s’Avisu IMPRENTAS 2025/2026.

Custa puru est una de is maneras profetosas pro avalorare sa limba nostra, sienda identitària non materiale chi sa sotziedade editora nostra est impignada a amparare dae annos meda, gràtzias a s’agiudu de s’Assessoradu de s’Istrutzione pùblica, Benes culturales, Informu, Ispetàculu e Isport de sa Regione. Cun s’ispera de fàghere crèschere fintzas s’alfabetizatzione, est a nàrrere is abilesas de lèghere e de iscrìere in sardu, de is leghidores. Sighide-nos in medas!

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.