Su bonucoro de sa provìntzia de Aristanis

Novas Aristanesas, martis 13 de ghennàrgiu de su 2026

Dae sa riabilitatzione a pustis de intzidentes graves a s’agiudu internatzionale: in sa provìntzia de Aristanis su bonucoro est movende persones e famìllias chi, acostende·si a chie afrontat tretos de vida dificultosos, chircat de mudare su dolore in unu sinnale de agiudu cuncretu.

In custas chidas sunt paritzas sas regortas de dinari nàschidas dae su bassu pro sustènnere istòrias de suferèntzia, ma fintzas de isperàntzia.

Sa prus reghente est sa regorta de dinari pro agiudare unu pitzocu de 38 annos, de Iscanu, chi est paralizadu dae su 2022 dae cando aiat tentu un’ intzidente istradale grave chi l’at causadu una lesione cervicale. Sa campagna de agiudu, lantziada in GoFundMe dae un’amiga, at superadu in pagas dies sos 30 mìgia èuros, cun prus o mancu 600 donatziones, e at a serbire a comporare agiudos de importu pro megiorare sa vida sua “noa” de onni die chi, a oe, tenet bisòngiu de assistèntzia 24 oras subra 24. Un impignu chi sa famìllia li dat cun fortza e amore ma chi a su matessi tempus rechedet impignu mannu ca sas netzessidades sunt mannas meda e sas ispesas difìtziles de afrontare.

Un’àtera regorta de dinari pertocat sa famìllia de un’àteru giòvanu, unu pitzocheddu de 14 annos chi est abarradu feridu a manera grae s’istiu passadu a pustis de unu tufu in Turre Manna, s’ùrtima die de iscola. S’initziativa, promòvida dae sa sorrastra, serbit a afrontare sas ispesas pro sas meighinas e sa riabilitatzione longa chi su pitzocu est afrontende dae prus de 7 meses in Emìlia-Romagna, a pustis de paritzas operatziones nèuro-chirùrgicas a pustis de s’intzidente.

Ma su bonucoro andat fintzas a foras de sos cunfines. Giorgia Pitzus, ostètrica giòvana de Miris, at a partire in freàrgiu a Tanzània pro un’esperièntzia de volontariadu in sala partu. Pro custu at comintzadu una regorta de materiale – bestires, produtos pro s’igiene, artìculos pro pitzinneddos de naschidòrgiu e materiale pro s’iscola – pro fèminas e pitzinnos chi bivent in cunditziones de dificultade.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.