Sos atletas de sa provìntzia de Aristanis si distinghent in sos isport

Novas Aristanesas, giòbia 15 de ghennàrgiu de su 2026

Su 2025 s’est serradu cun cuntentesa manna pro s’isport giovanile de sa provìntzia de Aristanis e su 2026 paret chi comintzet cun sa matessi idea.

Alessia Orro, pallegiadora de Narabuìa, at cunfirmadu su talentu ispantosu suo: posta in mesu de sas mègius pallavolistas de su mundu dae sos social de Volleyball World, sa nùmeru 8 de su Fenerbahçe est resurtada sa de tres, a pustis ebbia de sa giogadora italiana Monica De Gennaro e de sa brasiliana Gabi. A pustis bìnchidu su Mundiale cun sa natzionale italiana e a pustis retzidu su prèmiu comente mègius giogadora, Orro sighit a si distìnghere finas in su campionadu turcu, in ue su Fenerbahçe est segundu, e in Champions League, ghiende su grupu B in dae in antis de Novara, Benfica e Budowlani Lodz.

Vitòrias benint finas dae sa Raffa, cun sa prima editzione de “Corriamo con la Raffa” in su Tzentru federale Fib de Roma. S’iscuadra sarda est essida segunda in sa disciplina Navetta e in sa classìfica generale, paris cun sa Campània. Sa rapresentativa sarda, ghiada dae su tècnicu Michele Alastra e dae su dirigente Oscar Migliorini, est formada finas dae sos duos atletas Riccardo Mereu e Lorenzo Pozzato de sa Soms Oristano.

In su basket feminile, su Basket Ghilarza Under 14 est imbàtidu a sa prima vitòria de s’istajone: su 4 de ghennàrgiu sas bilartzesas ant bìnchidu su Sant’Òrsola Team 98 pro 48-44 in Tàtari in una gara gherrada puntu pro puntu. “Est una bìnchida istòrica pro sas pitzocas e pro sa sotziedade”, cummentat su presidente Marco Oppo, sutaliniende s’impignu e sa crèschida de su grupu, nàschidu ebbia pagos annos a como.

In ùrtimu, sa prima finale de Coppa Italia feminile de s’istòria de su Tennistavolo Norbello s’est serrada cun unu segundu postu importante.

Duncas, una sèrie de bìnchidas chi cunfirmat comente sa provìntzia de Aristanis est sighende a crèschere e a si distìnghere in s’isport giovanile, in setores diferentes, dae sa pallavolo a su basket, dae sa Raffa a su tennis de mesa, e àteru ancora.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.