Sagras, natura e cultura: sa coa de chida in zona de Aristanis

Novas Aristanesas, chenàbura 30 de ghennàrgiu de su 2026

Sagras, natura e cultura: sa coa de chida in zona de Aristanis – Eventos meda in custa coa de chida in provìntzia de Aristanis.

In su coro de sa badde de su Tirsu s’eventu prus ricu de agrùmenes: cras e pusticràs in Zrofoliu b’est sa de 28 editziones de sa Sagra de sos Agrùmenes, a incuru de sa Pro Loco e de su Comune. Assàgios de màndigos, ispetàculos e non podet mancare sa turta de sa solidariedade “Dultzura de agrùmenes de Zrofoliu” fata pròpiu cun sos agrùmenes de in ie.

Tèssere, picare e contare su benidore: dae eris in Sèneghe sunt comintzadas sas Dies de progetatzione condivìdida de su territòriu. Finas oe b’at un’atopu atzeleradu e pràticu, a indonu, pro istudiantes giovaneddos, imprendidores e progetistas noitzolos.

In sa galleria M-Arte de Aristanis cras sero un’ammentu de su poeta Badore Sini e de su feminismu suo antitzipadore de sos tempos, cun s’atopu “Luce e penna: storia di un poeta”.

In Abbasanta sighint a festare a Santa Amada (o Santa Dorotea): cras sero nd’ant a segare sa tuva.

Comintzant sas festas pro sos 50 annos de su grupu folk Onnigaza in Bilartzi: cras a merie in pratza de sa Sotziedade Operaja b’est Peri sa bidda, un’itineràriu acumpangiadu dae Tomaso Sanna, espertu de istòria bilartzesa, poi domìniga a merie in s’Auditòrium comunale s’antropòlogu Marcello Marras at a ghiare s’incontru Amos a arresonare de… dedicadu a Sonos e ballos de Carrasegare.

Pro sa Die mundiale de sos logos ùmidos, domìniga mangianu osservatzione de sos pugiones in s’istagnu de S’Ena Arrùbia e in sa laguna de Arborea cun sa LIPU, e bìsitas a sa turre de Marceddì pro sa mustra fotogràfica “Natura condivisa”.

In ùrtimu, ancora duas initziativas pro sa Die de sa Memòria: domìniga in Aristanis, in sa crèsia de Santa Chiara, sa cunferèntzia “Gli Ebrei di Sardegna durante la Shoah” a incuru de su monastèriu de Santa Chiara Cultura e de sa delegatzione FAI de Aristanis. Custu sero, imbetzes, in s’Ex-Bi de Abbasanta un’eventu (“Un frate nel lager di Zeithain”) chi faeddat de sos internados militares.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.