Sa provìntzia de Aristanis si tinghet de colore cun tantos eventos

Novas Aristanesas, chenàbura 9 de ghennàrgiu de su 2026

Un’àtera coa de chida de eventos de non pèrdere in provìntzia de Aristanis.

In Pau s’atopu est pro cras sero pro sa projetzione de su documentàriu “La rosa e il cubo” chi faeddat de sa vida artìstica de Giuseppe Bosich, in sa sala polifuntzionale de su Comune, in carrera Santu Giorgi. B’ant a èssere finas sos autores, Cinzia Carrus e Nicola Marongiu. Semper inoghe, si podet bìere, finas a su 31 de ghennàrgiu, sa mustra “Bosich: Uomo, Intellettuale, Artista” aprontada in sos locales de sa Domo Borrelli.

Custu sero, imbetzes, in sos locales de sa biblioteca betza de Abbasanta, in s’arborada delle Rimembranze, b’at a èssere sa prima de sas presentadas de libros programmadas pro su mese de ghennàrgiu. S’òspite de custu primu atòbiu est Francesco Abate chi, faeddende cun Jimmy Spiga, at a presentare “Gli indegni”, s’ùrtimu romanzu suo. Apassionante e malincònicu, su libru contat s’amore de duas ànimas rebelles chi si chircant e si persighint in sos annos Otanta discarados, emotzionantes, dolorosos. S’eventu est aprontadu dae su comune paris cun su sistema bibliotecàriu de Guìltzier.

In Samugheo, finas in sa coa de chida b’at vìsitas a su Murats pro sa mustra “Splendidi intrecci sulle Vie della Seta. Arte tessile dall’Asia Centrale e dalla Cina”, a incuru de Andrea De Pascale. Sa parada ponet a cunfrontu sas produtziones orientales cun sos tapinos sardos de mortu.

Àtera mustra de non pèrdere, in Aristanis, est sa de “Antonio Corriga. Idea e progetto”, a incuru de Sabina Corriga e Obler Luperi, in su Palatzu Arcais, chi si podet bìere finas a su 11 de ghennàrgiu.

E luego a pustis de su fine de chida, in tema de sa rassigna aviada dae Cedac, in su palcu de su teatru Garau lunis sero b’ant a èssere Ninni Bruschetta, Claudio “Greg” Gregori, Fabrizio Colica, Paola Michelini e Gianluca Musiu cun “A Mirror. Uno spettacolo falso e non autorizzato”, cumèdia niedda apassionante contra de sa tzensura, de Sam Holcroft.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.