Sa Provìntzia de Aristanis si preparat a su Carrasegare mannu de Sa Sartìllia, A Maimone e Su Marrulleri

Novas Aristanesas, martis 20 de ghennàrgiu de su 2026

Mancat semper prus pagu a su Carrasegare e sa Provìntzia de Aristanis si preparat a vìvere unas cantas manifestatziones suas intre sas prus antigas e ispantosas: Sa Sartìllia de Aristanis, A Maimone de Samugheo e Su Marrulleri de Marrùbiu. Tres apuntamentos diversos pro istòria, orìgines e traditziones, ma chi ischint unire sas comunidades e atirare bisitadores dae totu sa Sardigna, dae s’Itàlia e dae s’èstero.

In Aristanis, domìniga 15 e martis 17 de freàrgiu, torrat sa Sartìllia, sa giostra antiga medievale a caddu de s’ùrtima domìniga e de su martis de Carrasegare. Connota pro sa cursa a s’istella e sas parìllias acrobàticas, biet protagonistas 120 cavalieris mascarados in bestimentas de fatura sarda e ispagnola, ghiados dae su capu-cursa, Su Componidori, acumpangiadu dae Su Segundu e Su Tertzu.

Intre trumbas e tamburos, in sa carrera Duomo sos cavalieris chircant de infèrchere s’istella apicada a unu nastru birde mentres in carrera Mazzini si current sas Parìllias. Sa domìniga sa giostra est a incuru de su Grèmiu de sos Massajos, su martis de cussu de sos Mastros de linna.

In Samugheo, domìniga 8 de freàrgiu, b’at a èssere su Carrasegare antigu traditzionale cun s’editzione n° 29 de A Maimone. Organizadu dae s’Assòtziu Culturale Mamutzones de Samugheo, s’avenimentu nche leat sos ispetadores in un’atmosfera antiga intre ritos e màscaras. Deghinas de grupos ant a isfilare peri sas carreras de sa bidda. Presente fintzas una màscara “ospite” de foras.

In fines, Marrùbiu si preparat a Su Marrulleri 2026, chi festat s’editzione n°46 cun tema “Su coro de sa traditzione”. Tra su 12, 15 e 22 de freàrgiu b’ant a èssere sas isfiladas de sos pitzinnos, de sa comunidade locale e, in fines, cussa regionale cun figurantes dae totu s’Ìsula. Reconnotu dae su Ministeru de sa Cultura comente Carrasegare istòricu, Su Marrulleri unit s’arte de sa carta pesta a s’allegria de sos carros cun figuras simbòlicas e brullanas, màscaras de sa traditzione e assàgios de produtos locales.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.