Sa Die de s’Ammentu

Novas Aristanesas, martis 27 de ghennàrgiu de su 2026

Sa Die de s’Ammentu – Su 27 de ghennàrgiu est sa Die de s’Ammentu, dedicada a s’ammentu de sos mortos de s’Olocausto e de sos soprusos dae parte de sos nazi-fascistas. Sa data cointzidet cun s’anniversàriu de cando nd’aiant ghetadu a terra sos cantzellos de su campu de Auschwitz, sìmbulu de sa Shoah e de sa bochidura de milliones de persones.

In Itàlia sa die est istada istituida cun sa lege n. 211 de su 20 de trìulas de su 2000, pro cunservare sa memòria de sas leges ratziales, de s’opressione de su pòpulu ebràicu e de chie est istadu vìtima de sa violèntzia e de sos maltratamentos de su regime nazi-fascista. Su valore universale de custu ammentu est istadu reconnotu fintzas dae s’Organizatzione de sas Natziones Unidas in su 2005.

Fintzas sa provìntzia de Aristanis partètzipat a s’ammentu cun initziativas meda. Intre custas, una mustra e una cunferèntzia dedicadas a sa cultura materiale de sa Resistèntzia, organizadas dae s’Anpi de Aristanis. Sa mustra, curada dae s’archeòlogo e chircadore istòricu Francesco Marchetti, est aprontada in su logu intituladu a Flavio Busonera, partigianu de Aristanis mortu dae sos fascistas, e proponet ogetos e repertos chi descrient sa vida de onni die de sos partigianos e de sos contràrios a sa leva de sa Repùbblica de Salò.

A sero, in su Tzentru Servìtzios Culturales Unla, b’est sa cunferèntzia “La cultura materiale della Resistenza”, cun Francesco Marchetti e sa presidente de s’Anpi Aristanis, Carla Cossu. S’Unla proponet fintzas sa mini-rassigna tzinematogràfica “Ogni persona fa la sua scelta”, proietende sos films La zona d’interesse de Jonathan Glazer (su 28 de ghennàrgiu) e One Life de James Hawes (su 29 de ghennàrgiu).

In Santeru, in su giardinu de su Museu Santeru, b’est in fines su reading musicale “I bambini giocano alla guerra”, de Paolo Vanacore e de Giambattista Angotzi, pro “I giorni della memoria” de su Tzentru de Documentatzione de sa Memòria, cun s’Iscola Tzìvica de Mùsica.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.