Sa bia betza de sa Nato si fùrriat a chistione polìtica

Novas Aristanesas, mèrcuris 28 de ghennàrgiu de su 2026

Sa bia betza de sa Nato, chi aunit a pare s’Istatale 126 cun sa Provintziale 65 passende peri is sartos de Gùspini e Arcidanu, s’est furriada a èssere una chistione polìtica.

Sa chistione nde fiat essida a campu cun sa regorta de is firmas cuncordada dae Michela Lampis, Sergio Floris, Luana Demuru e Mauro Loru chi, paris cun is residentes, aiant denuntziadu sa perigulosidade de sa bia “prena de dislivellos, foradas, seddatzos e surcos ingendrados dae s’impreu dae parte de s’òmine e dae su tempus”, a prus de sa mancàntzia de sa sinnalètica orizontale e de is banchinas a su costau. S’importu de cussa bia est mannu, pro ite ca gente meda ddoe passat pro chistiones de traballu, de istùdiu, de sucursu e pro turismu e est s’ùnica bia de collegamentu cun is prajas e is costeras arburesas, a pustis de sa serrada de su ponte de Marceddì.

Su sìndigu de Arcidanu, Davide Fanari, at regordadu chi su tretu de cumpetèntzia comunale aiat connotu acontzos de importu e àteras fainas de contivìgiu e chi is cunditziones peus s’agataiant in su tretu guspinesu de sa bia.

Fintzas sa Cambarada de is Frades de Itàlia de su Consìgiu regionale aiat presentadu unos cantos emendamentos, in is ùrtimos duos annos, pro nde finantziare su contivìgiu: 500 mìgia èuros in su 2024 e unu millione in su 2025 e, ancoras, un’àteru in sa finantziària de su 2026, ma sa majoria non ddos at aprovados.

In fines, sa chistione est lòmpida a is bangos de su Consìgiu regionale cun sa motzione urgente presentada dae Orizzonte Comune. Sa motzione, comente narat su consigieri Salvatore Cau, domandat de pònnere in seguresa sa bia, de ddi torrare a fàghere s’asfaltu, sa sinnalètica, is banchinas a su costau, pro ismenguare s’arriscu chi current is chi ddoe passant, prus che totu in s’istadiale.

Ma sa nova est arribada una pariga de dies a oe, cando su consigieri regionale Emanuele Cera at annuntziadu s’arribu de unu finantziamentu pro su Comune de Gùspini pro su contivìgiu istraordinàriu de sa bia e pro dda pònnere in seguresa. Unu capìtulu nou, chi diat pòdere fàghere acabbare totu is chèscias in contu de custa bia chi portat cara a sa marina de Arbus.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.