Megioramentos, istruturas noas e traballos: Terraba e Crabas sunt duos cantieris mannos

Novas Aristanesas, mèrcuris 14 de ghennàrgiu de su 2026

In Terraba e Crabas cantieris meda e progetos pro megiorare seguresa, servìtzios e calidade de sa vida.

S’elencu de sos cantieris abertos o chi s’ant a abèrrere in Terraba est longu. Intre sos interventos prus de importu s’asilu niu nou in carrera Sardigna, sa manutentzione de cussu chi b’est e su megioramentu energèticu de s’iscola primària de carrera Roma. Sa seguresa de sas istradas at a èssere afortigada cun atraessamentos pedonales artziados noos, sinnalètica e illuminatzione potentziada. S’ant a pònnere 40 telecàmeras e s’at a impreare unu robot pro sa vìdeo-ispetzione de sas condutas. Sighint sos traballos in sa domo pro sos betzos, su ponte de Marceddì, su megioramentu de s’ex cantina e de su tzentru istòricu e sa pista tziclàbile Terraba-Marrùbiu.

“Sa punna nostra est crara”, narat su vitze-sìndigu Andrea Grussu, “rèndere sa tzitadina nostra prus segura, pragherosa e moderna, megiorende meda sa vida de sa comunidade nostra”.

Fintzas Crabas puntat a fàghere interventos de importu, cun su bilàntziu 2026-2028 chi finàntziat traballos pùbblicos, cultura e sotziale. Intre de custos s’acontzu de s’ex asilu pro unu tzentru de giòvanos, manutentzione de sas domos populares, adeguamentu de sa viabilidade de su PIP e traballos pro pònnere in seguresa s’iscola de s’infàntzia de carrera De Gasperi.

Atentu mannu a su patrimòniu archeològicu; in Solanas si torrat a fraigare s’iscola materna de pratza Muscas e si torrat a fàghere su campu de fùbalu. In fines si megiorat sa viabilidade intre Crabas e Santu Giuanne de Sinis.

“Amus oramai fatu, gràtzias a unu traballu de programmatzione atentu, una filera de importu mannu de interventos istruturales”, at naradu su sìndigu Andrea Abis, “chi semper prus ant a ispìnghere a Crabas a cara a unu pretzisu abbaloramentu sòtziu-econòmicu chi at a èssere de importu mannu pro su setore de su turismu e de sos cumpartos de sas produtziones primàrias de sa pisca e de s’agricultura”.

Maria Giovanna Serchisu

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.