Marceddì tramudat a su Comune de Terraba, intra de presu e calicuna chèscia

Novas Aristanesas, sàbadu 31 de ghennàrgiu de su 2026

Marceddì tramudat a su Comune de Terraba, intra de presu e calicuna chèscia – A pustis de annos e annos de abetu, sa borgata de Marceddì at a tramudare a manera ufitziale a su Comune de Terraba.

Dd’at annuntziadu s’assessore regionale de is Entes locales, Finàntzias e Urbanìstica, Francesco Spanedda, chi at faeddadu de “unu passu de importu”, gràtzias fintzas a sa sentèntzia de sa Corte Costitutzionale de su 2024. In is dies imbenientes s’at a incarrerare su cunfrontu tècnicu intra de Regione e Comune de Terraba, pro istabilèssere tempos e atos chi serbint a su tramudu de sa biddighedda de costera dae un’amministratzione a s’àtera.

A parre de Spanedda, est una faina no simpre in contu de “una biddighedda nàschida dae sè, cun crititzidades mannas pro su chi pertocat s’edilìtzia, is normas urbanìsticas e is normas paesagìsticas”.

Sa borgata de Marceddì, in su 2013, s’Agentzia de su Demàniu dd’aiat torrada a sa Regione Sardigna, a pustis de su tramudu dae sa Capitaneria de Portu. Su logu, duncas, dae sa propriedade de s’Istadu fiat intradu in poderiu de sa Regione, chi aiat incarreradu una faina de calificatzione noa, a manos de pare cun su Comune de Terraba.

Presu mannu at espressadu fintzas su consigieri regionale de su M5S Alessandro Solinas, pro “custu passu de importu”, regordende comente sa regularizatzione de sa borgata esseret intra de is prioridades giai dae su cumentzu de sa legisladura. Bonu fintzas su cummentu de is consigieris de minoria de Terraba, chi faeddant de “una simana noa de avaloramentu e regularizatzione, abetada dae tempus meda”, invitende però s’Amministratzione comunale a s’afateriare pro chi custu tradumudu potzat èssere cumpridu in sa mègius manera.

Ma no mancant is chèscias. Su consigieri regionale de is Frades de Itàlia Emanuele Cera bantat su traballu fatu in sa legisladura betza e faeddat de unu resurtadu chi lompet “in ritardu mannu”. Is faeddos suos ant ischinnitzadu sa torrada de su referente terrabesu de su Partidu Democràticu, Roberto Marongiu, chi imputat a Cera de ismanniare su contu e regordat s’impinnu de sa Giunta regionale de tzentru-manca, chi at fatu a manera de incungiare custu resurtadu de importu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.