Is novas de sa sanidade aristanesa

Novas Aristanesas, giòbia 29 de ghennàrgiu de su 2026

Is novas de sa sanidade aristanesa – In sa sanidade de sa provìntzia de Aristanis ddoe at carchi nova de importu.

In su poliambulatòriu de Terraba, dae su 19 de ghennàrgiu, est mudada s’organizatzione pro is prelievos de sàmbene: non faghet prus a ddos prenotare. Is tzitadinos, comente regordat sa ASL 5 de Aristanis, ant a pòdere andare in deretura a su tzentru de bia de su Riu de Mòguru, dae su lunis a sa chenàbura, dae is 7.50 a is 9.30. Ònnia die s’ant a pòdere fàghere totu a su prus 20 prelievos, ma tocat in antis a pigare su nùmeru a intro de is 9.15 (ma diant pòdere ispatzare in antis).

In Aristanis, in su poliambulatòriu de bia de Michele Pira, si torrant a fàghere is bìsitas de ispetzialìstica ambulatoriale de Gastroenterologia. Dae su 12 de ghennàrgiu, is mèigos de s’Unidade de Endoscopia digestiva de s’ispidale “Santu Martinu” assegurant is bìsitas, a pustis de sa firmada de su servìtziu pro more de s’andada in pensione de s’ispetzialista. S’ambulatòriu at a fàghere pro su prus primas bìsitas e controllos, segundu sa prioridade inditada in sa retzeta. Sa tarea de su servìtziu est sa de megiorare sa giustesa de is prescritziones e sa de assegurare un’assistèntzia de calidade bona, cun un’atentu particulare a is malàidos cun livellos diferentes de situatziones clìnicas. Is prenotatziones si podent fàghere cun su Cup Web, cun su Cup a telèfonu o in is isportellos Cup de is ispidales.

In prus, a s’Unidade operadora de Endoscopia digestiva de s’ispidale “Santu Martinu” de Aristanis ddoe est arribada sa terapia biològica pro curare is maladias infiammadoras crònicas de s’istentina (Mici), comente a sa Maladia de Crohn e sa Retocolite ultzerosa. Sa cura noa est unu passu in dae in antis de importu in su caminu de annoadura e mègioru de s’assistèntzia a is malàidos.

In fines, fintzas Sèdilo tenet un’ambulatòriu territoriale istraordinàriu (Ascot), abertu dae su 15 de ghennàrgiu in bia de Fara n. 2, su mèrcuris e sa giòbia, dae is 8.00 a sa una. S’ambulatòriu naschet a pustis chi est andadu in pensione su mèigu de base Peppino Canu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2024-2025 – L.R. 22/2018, art. 22.