In sa coa de chida aristanesa eventos in cantidade

Novas Aristanesas, sàbadu 17 de ghennàrgiu de su 2026

In sa coa de chida aristanesa eventos in cantidade – Apuntamentos noos in sa coa de chida in provìntzia de Aristanis.

A pustis chi in santandria fiat istadu rinviadu, Sèneghe oe e cras òspitat Prentzas Apertas. Intre mòlinos de olia, domos antigas, ortos e magasinos, sa manifestatzione agiuat a connòschere mègius s’ògiu de olia prus meru e sas traditziones culturales, enogastronòmicas e antropològicas de sa bidda.

Custu sero, imbetzes, in sa biblioteca comunale de Baullau, Patrizia Cadau presentat su libru suo “Volevate il silenzio – Avete la mia voce. Cronache dal multiverso della violenza, di una sopravvissuta che non sta zitta”.

Immàgines antigas, vìdeos, installatziones multimediales e repertos archeològicos. Custu mangianu in su Museu Diotzesanu de Aristanis, sa Fondazione Mont’e Prama aberit sa mustra “Tharros. Time Upon Time”.

Momentos de sa fide cun sas funtziones pro Santu Antoni de su Fogu. A pustis de sos fogulones chi eris sero ant allutu sas pratzas de tantas biddas, in logos meda de Mandrolisai, de Barigadu, de Montiferru e de Sarcidanu oe si sighit cun sas funtziones religiosas. In Samugheo, a pustis allutu eris “Su fogolone”, custu mangianu ant fatu sa protzessione solenne. In Làconi, imbetzes, a pustis de su fogulone e de sa prima essida de Su Corongiaiu, oe ant fatu sa missa e beneitu sos animales. Sos animales e su fogu los ant a beneìghere finas in Aristanis, cras mangianu, in sa parròchia de sos Caputzinos, a pustis de sa missa fata dae padre Gianluca Longobardi.

Sa salude est istada protagonista in su teatru de sos Salesianos de Arborea, cun unu mangianile dedicadu a sa preventzione de sa diabete de tipu 2, cun controllos gratùitos e aprofundamentos.

In ùrtimu, cras sero in s’auditòrium comunale Aldo Moro de Bilartzi ant a presentare su libru de Giovanni Seu Lombardini il giudice sceriffo, chi faeddat de una figura importante e dudosa de s’istòria giuditziària sarda.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.