Fide e traditzione andant paris in provìntzia de Aristanis cun sos fogulones de Santu Antoni e de Santu Sebastianu

Novas Aristanesas, chenàbura 16 de ghennàrgiu de su 2026

In su mese de ghennàrgiu, su fogu torrat a èssere su tzentru simbòlicu de sa vida comunitària in biddas meda de sa provìntzia de Aristanis cun sos fogulones de Santu Antoni e de Santu Sebastianu.

Su fogulone de Santu Antoni marcat finas s’incomintzu de su Carrasegare, cun sa prima essida de sas màscaras traditzionales.

Narat su contu chi su santu, intre su 16 e su 17 de ghennàrgiu, nche fiat caladu a s’inferru pro nde furare un’ischintidda de dare a sos òmines chi fiant morende de fritu. E in custa data sas comunidades s’aunint pro mandare a in antis sa traditzione.

In Samugheo su fogolone acumpàngiat sa essida de sos Mamutzones; in Neoneli su ritu est prus privadu, acumpangiadu dae su ritmu de Sos Corriolos. In Làconi su fogu marcat sa prima essida de Su Corongiaiu pro cussa istajone, imbetzes in Pardu Nou est prus chi no àteru unu momentu de unione pro sa comunidade. In Àllai, “Su Fogalone de Sant’Antoni” aunit su calore de sa bràsia a sos sabores de su territòriu, mudende su fogulone in un’esperièntzia comunitària.

Pagas dies a pustis, intre su 19 e su 20 de ghennàrgiu, si torrat a repìtere sa magia cun sos fogos de Santu Sebastianu. Una traditzione importante meda, chi aunit su ritu religiosu e sa festa populare.

In Ollasta est unu de sos momentos prus isetados de s’annu, in ue sunt protagonistas is sòtzius, sos grupos chi tenent s’incàrrigu de regòllere sa linna e de aprontare sos carros. Sos figurantes in costùmene traditzionale e sas panderas nch’intrant a bidda cun tratores, giuos de boes e tuvas mannas, in unu ritu colletivu chi finit a inghìriu de su fogulone. Non mancat sa parte gastronòmica cun sa Sagra de sa faa e de su fasolu tundu.

In Ales, de regòllere sa linna si nd’incàrrigat unu grupu ebbia e su fogulone si allumat su sàbadu a pustis, contra a su chi faghent sos àteros. In Crucuris sa festa pro su santu patronu est unu momentu importante meda pro sa vida de sa bidda, e in Samugheo finas pro su fogulone de Santu Sebastianu essint sas màscaras.

Gianfranca Piras

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.