Arborea dat su bene bènnidu a s’annu nou cun Brusa la Vecia

Novas Aristanesas, lunis 5 de ghennàrgiu de su 2026

Ocannu puru Arborea amegat de s’aprontare pro saludare s’annu nou cun unu de is apuntamentos prus abetados dae sa comunidade, pro sa càrriga de identidade chi tenet e chi espressat, in su surcu de su connotu, de sa cumpartzidura e de s’ispera.

Cras, die de sa Pasca de is Tres Rees, ddoe ant a torrare a fàghere “Brusa la vecia”, lòmpida ocannu a sa de 28 editziones: un’acontessimentu capatzu de pònnere paris istòria e connotu, mùsica e baddos, isciala e sabores antigos, in una festa chi at a tirare fintzas a note tarda.

Su fogulone de auras bonas est sa parte prus de importu de sa festa e ònnia annu arranguitzat a gente meda, fintzas dae is biddas acanta. Unu ritu càrrigu de significados simbòlicos, chi acumpàngiat s’incarreru de s’annu nou comente a faina de bona aura e comente a un’ocasione de unione forte pro sa comunidade.

Comente a semper, de s’aparitzu si nde incurat sa Pro Loco de Arborea, ghiada dae Paolo Sanneris, a manos de pare cun s’Amministratzione comunale. In custas dies passadas is voluntàrios ant segadu sa linna e sa canna chi serbit pro su fogu, chi dd’ant a allùghere in dae in antis de su fàbbricu de sa Fiera, in sa bia 19 est.

Su fogulone dd’ant a allùghere cras, 6 de ghennàrgiu, fache a ora de is oto e mesu de merie. In mesu de su fogu, comente a semper, ddoe at a èssere sa “Vecia Befana”, sinnu de s’annu passadu, chi si lassat a palas. A inghìriu de su fogu at a addobiare totu sa comunidade, pro nche bogare is dificultades e propassare is barrancos e pro castiare a su tempus benidore, chi s’isperat siat bonu.

A pustis de su fogulone, sa festa at a sighire cun un’isciala in ue s’at a pòdere papare màndigos de su connotu, comente a su fasolu, acumpangiadu totu dae mùsica e àteros istentos.

“Brusa la Vecia” est una festa de su connotu de is famìllias vènetas lòmpidas a Arborea in su 1928 e, oe in die, est un’acontessimentu aggradèssidu e sentidu meda.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.