A pustis de 15 annos, in s’Artzidiòtzesi de Aristanis si torrat a fàghere sa bìsita pastorale

Novas Aristanesas, sàbadu 10 de ghennàrgiu de su 2026

A pustis de 15 annos, in s’Artzidiòtzesi de Aristanis si torrat a fàghere sa bìsita pastorale. S’artzipìscamu munsennore Roberto Carboni at a saludare, duncas, is comunidades de s’Artzidiòtzesi.

Sa prima firmada de custu caminu longu chi in is tres annos imbenientes at a interessare 85 parròchias at a èssere in Crabas. Sa comunidade, chi faghet parte de su vicariadu foràneu de Nostra Sennora Pigada in Chelu, est formada dae duas parròchias: cussa de sa crèsia de Santa Maria e cussa de sa crèsia de su Coro de Gesùs. Ambas duas parròchias ant a èssere interessadas in custa bìsita cumentzende dae cras e fintzas a su 24 de ghennàrgiu, cun unu calendàriu prenu de tzelebratziones e de addòbios chi ant a permìtere a s’artzipìscamu de connòschere mègius sa realidade de su logu.

Si cumentzat domìnigu cun sa Missa in Santa Maria, sighida dae s’assemblea interparrochiale. In is dies afatantes sunt in programma addòbios cun is malàidos, is iscolas, is maistras e maistros de dotrina, is animadores, is cunfrarias, is cambaradas litùrgicas e is realidades acapiadas a sa religiosidade populare.

S’at a fàghere unu cunfrontu cun su mundu de sa caridade e de su voluntariadu, cun addòbios dedicados a sa Caritas e a su voluntariadu vincentzianu, a prus de sa bìsita a su campusantu e de àteras fainas abertas a sa comunidade tzivile.

Dae su 17 de ghennàrgiu sa bìsita at a sighire in sa parròchia de su Coro de Gesùs, cun sa Missa de cumentzu, s’addòbiu cun is pitzocheddos de s’oratòriu, is bìsitas a is malàidos e a is iscolas mèdias e unu cunfrontu cun su mundu de su traballu, chi at a interessare s’artesania, sa pisca, su turismu, sa laurera e su pastoriu, s’edilìtzia.

Ma no ant a mancare is addòbios istitutzionales, cun sa bìsita a su Comune de Crabas, e is addòbios de genia amministrativa e pastorale cun is consìgios parrochiales. Sa bìsita at a acabbare sàbadu 24 de ghennàrgiu cun sa Missa Manna de serrada in Santa Maria e cun unu cuntzertu pro torrare gràtzias a su pìscamu.

Su caminu de s’artzipìscamu at a sighire fintzas a su 2028. In unas cantas parròchias comente a is de Ollasta, Siamanna, Siapicia, Biddanoa Truschedu e Biddobrana, sa bìsita s’at a fàghere in su 2027.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2025-2026 – L.R. 22/2018, art. 22.