Novas Aristanesas, mèrcuris 4 de nadale de su 2024

Intre istòria e arte: mustras meda in sa provìntzia de Aristanis – Dae Aristanis a Crabas, passende peri Samugheo e Sèdilo, sunt medas sas mustras chi imbonint sas salas de sos museos de totu sa provìntzia, faeddende de sos territòrios, de artistas famados e de impresas de sos protagonistas mannos de s’istòria sarda.

Movende dae su cabu-logu, si podet fàghere tapa in su Museu Diotzesanu Arborense pro sa mustra “Sas formas de su fogu”, un’aprètziu a su tzeramista Angelo Sciannella cun prus de 70 òperas dae sos annos Chimbanta a dies de oe. S’espositzione s’at a pòdere bisitare finas a su 29 de nadale, onni mèrcuris dae sas 10 a sas 13 e dae sa giòbia a su domìnigu dae sas 10 a sas 13 e dae sas 17 a sas 20.

Semper in su Museu Diotzesanu b’est puru “Regarder. Sos aposentos de sa memòria”, personale de s’artista La Fille Bertha, nùmene de arte de Alessandra Maria Pulixi, chi presentat 70 òperas, intre telas, tzeràmicas e unu cuncordu mannu. Sa mustra si podet bisitare in sos matessi oràrios de “Sas formas de su fogu”.

Finas a su 16 de freàrgiu, in su Museu de su tessìngiu de Samugheo, b’est “Restano solo i fili e i sostegni”, nàschida dae sa chirca artìstica de Daniele Frongia. Cun sas òperas suas, s’artista contat s’isvilupu de su raportu suo cun su filu. Si podet bisitare dae su martis a su domìnigu, dae sas 10 a sas 13 e dae sas 15 a sas 18, in sos oràrios de abertura de su museu.

In su museu “Giovanni Marongiu” de Crabas, in sa coa de chida passada, ddoe ant abertu sa mustra “Sulle spalle dei Giganti – La preistoria moderna di Costantino Nivola”, chi rendet onore a s’iscultore sardu famadu. S’aprontamentu at a abarrare in su museu finas a su 23 de martzu e s’at a pòdere bisitare dae su martis a su domìnigu, dae sas 10 a sas 18.

In fines, in Sèdilo, b’est sa mustra interessante “Mare Nostrum”, chi contat sa Sardigna comente a tzentru de sas rotas cummertziales de su Mediterràneu in sos sèculos. Si podet iscobèrrere su passadu antigu de s’ìsula su sàbadu e su domìnigu a sero, dae sas 15 a sas 17. 

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.