Novas Aristanesas, mèrcuris 11 de nadale de su 2024

Cara a sa Sartìllia 2025 – Cun s’arribu de su mese de nadale, in Aristanis sighit totu su cuncordu de sa Sartìllia. Sàbadu passadu ant numenadu a is cabu-currera, unu momentu de importu chi marcat su cumentzu de su contu a s’imbesse pro sa manifestatzione aristanesa de su connotu.

A is cumponidores ddos ant seberados is Grèmios. Su grèmiu de is Massajos at inditadu a Diego Pinna, unu de is cadderis de sa Sartìllia chi tenet prus esperièntzia, chi at curtu prus de binti bortas. Sa nòmina sua dd’at bogada a manera ufitziale s’oberaju Gabriele Pinna. In sa Sartìllia de su domìnigu a Pinna dd’ant a acostagiare Pietro Putzulu e Angelo Porta.

Su grèmiu de is Maistros de linna pro su rolu de cumponidore at seberadu a unu cadderi giòvanu: Salvatore Aru s’at a pònnere sa bestimenta de su cabu-currera in sa Sartìllia de su martis. Custu determinu dd’at fatu a ischire su Majorale Antonello Fenu. A Aru dd’ant a acumpangiare Antonio Giandolfi e Stefano Spiga.

Su 7 de su mese de nadale est istada una die de festa fintzas pro sa Sartilliedda 2025, sa currera a caddu fata dae is pitzocheddas e pitzocheddos. In sa sea de sa Pro Loco de Aristanis ddoe ant fatu sa presentada ufitziale de sa parìllia de su Cumponidoreddu, formada dae Giulia Atzei, Laura Firinu e Camilla Daga, saludadas dae is tumborràrgios e trumbiteris piticheddos.

In su pròpiu addòbiu ant iscoviadu fintzas su nòmene de sa pitzoca chi at a fàghere a Lionora de Arbaree in sa Sartìllia de su 2025: at a èssere Eleonora Demontis, chi faghet parte de una de is famìllias prus nòdidas de sa currera de su Carrasegare aristanesu. Ajaju suo, Antonio Fiori, connotu cun su paranòmene de “Melanzana”, est istadu unu sartilliante nòdidu meda, acapiadu dae semper a sa currera a caddu de Carrasegare.

Sa presentada de is cabu-currera est istada un’iscuta ispetziale, chi at interessadu is famìllias de is cadderis cun sentidos de emotzione manna. Su caminu cara a sa Sartìllia 2025 oramai est cumentzadu: sa tzitade amegat de si preparare pro bìvere ocannu chi benit puru sa maia de sa currera a caddu chi faghet arribare a Aristanis mìgias e mìgias turistas dae ònnia ala de su mundu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.