Novas Aristanesas, martis 17 de nadale de su 2024

Sa provìntzia si tinghet cun tantos naschimentos – Intre sos sìmbulos tìpicos de su Nadale, sos naschimentos, sos presèpios paritzas bortas sunt su coro de tantas propostas finas in provìntzia de Aristanis: dae sos traditzionales, finas a sos prus originales, agiuant a mantènnere sas comunidades aunidas e a nde contare s’istòria.

Movimus dae su presèpiu lagunare partetzipadu, un’òpera istrinada in Santa Justa cando est comintzadu “Nadale in laguna cun is fassonis”: sunt pròpiu custos ùrtimos sos protagonistas mannos de s’òpera. A curtzu a sa natividade b’at iscenas chi contant comente s’aprontaiant sas imbarcatziones tìpicas de Santa Justa e sa vida in sa bidda in oros de s’istagnu.

Finas in Sabarussa su presèpiu fatu dae sa Pro Loco cheret rapresentare momentos de sa vida de onni die. In mesu de sas màgines chi bogant a campu traballos diferentes, comente tzilleràrgios, pàrracos e pastores, si b’agatat bìngias e gente faghende augùrios cun sa garnatza de sa bidda.

In Cùglieri ant dadu campu a sa creatividade de sa gente, chi in sas carreras de sa bidda de Montiferru at aparitzadu sa bellesa de 24 presèpios, finas unu animadu, pro su cuncursu ideadu dae su Tzentru cummertziale naturale. B’at chie at rispetadu sa manera prus clàssica, ma finas chie at seberadu materiales avantzados: sa bidda però at a dèvere isetare su 6 de ghennàrgiu pro ischire sos nùmenes de sos binchidores.

In sa parròchia de Santu Giusepe Traballadore, in Aristanis, carchi personàgiu originale at dare manera de pensare in contu de sa sotziedade de oe. Gasi, a curtzu a sos personàgios prus tìpicos b’ant a èssere su giornalista, su sabateri, su rapper, su mastru de muru, su brocaju, su perdulàriu, e un’òmine chirradu a un’ala, chi rapresentat sos prus pòberos chi bivent in s’oru de sa sotziedade. Isetende sa Paschighedda, a onniunu de custos si-lis at a dedicare un’atopu, in ue una cambarada de parrochianos at a interpretare e presentare onni personàgiu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.