Novas Aristanesas, lunis 23 de nadale de su 2024

Aristanis e Bosa s’imbonint – Duas tzitades de sa provìntzia de Aristanis s’imbonint. In su cabu-logu de provìntzia ant torradu a abèrrere duas pratzas istòricas, cun sa punna de ofèrrere a sa tzitade prus birde pùblicu ma fintzas logos prus discansosos pro sa sotzializatzione.

Sa prima, pratza de Manno, dd’ant aberta sàbadu 7 de nadale, presentes is autoridades de sa tzitade. Is traballos de imbonimentu ddos at fatos s’impresa Ghiaccio a tenore de su progetu chi aiat bintu unu cuncursu de ideas bogadu dae su Comune e pensadu dae una cambarada de professionistas. Su progetu at sighidu s’àndala de un’idea noa de gosamentu e bivibilidade de is logos abertos, a manera de favorèssere sa cuncàmbia intra de sa parte prus antiga de sa tzitade e is bighinados noos.

S’àtera pratza chi is Aristanesos nde podent torrare a gosare est pratza de Marianu, aberta chenàbura passada, 13 de nadale. Aristanis, duncas, si-nd’est torrada a pònnere mere de un’àteru logu istòricu, torradu a assentare a nou cunforma a is bisòngios chi sa comunidade tenet a dies de oe.

Ma novas bellas arribant finsas dae sa tzitade oru oru de su frùmene Temo: in Bosa no ant a istentare a pònnere sa zona a tràficu mesuradu (ZTL) in is bighinados antigos, cun telecàmeras e averiguaduras eletrònicas in is intradas. Sa nàschida de sa ZTL dd’ant pensada pro chi sa parte antiga de sa tzitade nde tengat profetu: siat pro s’ismèngua de s’incuinamentu acùsticu e atmosfèricu, siat pro sa crèschida de sa seguresa de is pedones, siat pro pòdere gosare mègius de su patrimòniu culturale, istòricu e artìsticu, siat pro megiorare sa bivibilidade de cussos bighinados pro is chi ddoe bivent, pro is butegas chi ddoe sunt e pro is turistas chi ddoe passant.

Ma Bosa s’at a fàghere fintzas prus birde, gràtzias a 200 mìgia èuros de finantziamentos regionales pro assentare is bias oru oru de su Temo e pro megiorare unos cantos prados e giardinos de sa tzitade. Ma s’Amministratzione comunale tenet in programma fintzas traballos noos pro acontzare su teatru tzìvicu, serradu oramai dae su 2015.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.