Novas Aristanesas, lunis 2 de nadale de su 2024

Novas Aristanesas, lunis 2 de nadale de su 2024

In provìntzia de Aristanis agiudant sa Natura – Is efetos de is fainas de s’òmine in sa Natura si bient semper de prus: padentes segados, incuinamentu e fogos minetzant semper de prus su logu in ue bivimus. Pro parare fronte a custa situatzione, non sunt pagas is comunidades chi in provìntzia de Aristanis amegant de traballare pro illebiare su problema.

Cumentzende dae Marmidda, in ue is voluntàrios de Plastic Free sunt semper afainados pro pulire su sartu cuncordende dies ecològicas: s’ùrtima dd’ant fata una pariga de chidas a oe in Crucuris e at interessadu prus de duos chilòmetros oru oru de sa Bia Provintziale n. 72. Is voluntàrios nd’ant boddidu unos cantos sacos de àliga e su referente de Plastic Free de zona, Luciano Montanari, at sutaliniadu s’importu de nde boddire custa genia de àliga dae su sartu, pro evitare chi s’ingendrent is microplàsticas.

Su Campidanu de Terraba puru in custas chidas passadas at fatu sa parte sua. In Marrùbiu is pitzocheddos de iscola sunt istados protagonistas, prantende in is giardinos de is iscolas issoro unu muntone de matas. Su Comunu puru at fatu sa parte sua, prantende una mata noa pro onni pipia/u nàschida/u ocannu.

In Terraba puru su birde s’isparghet gràtzias a is fainas de su Comune e de Legambiente, in ocasione de sa Die de is matas 2024. Difatis, ant prantadu matas meda regordende chi “Is matas nos dant meda, immoe tocat a nois”.

In Arborea, imbetzes, amegant de assentare ancoras is efetos de su fogu chi si-nche aiat mandigadu una parte manna de s’opinedu in su 2019: a dolu mannu una parte de tres de is 10.000 matigheddas de opinu masedu prantadas intra de su 2021 e su 2023 no at pigadu e, duncas, ddas ant a dèpere remplasare. S’Agentzia Forestas ddoe at a torrare a traballare in su beranu imbeniente, pro nche torrare su birde in cussos ètaros e ètaros de opinedu destruidos dae su fogu dannàrgiu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.