Novas Aristanesas, giòbia 19 de mese de idas de su 2024

Novas Aristanesas, giòbia 19 de mese de idas de su 2024

Is addòbios de custa coa de chida in provìntzia de Aristanis – Sunt medas is addòbios de custa coa de chida in provìntzia de Aristanis. In Donigala Fenughedu, Ros’e Mari Farm & Greenhouse acasàgiat “Serras de Paschighedda” cun mercadeddos de Paschighedda, animatzione, sa pista de patinàgiu e mùsica. Sa maia de Paschighedda s’at a pòdere bìere fintzas in Cùglieri, cun apuntamentos noos cuncordados dae su Tzentru cummertziale naturale. In Narabuia, domìnigu a mangianu, is mercadeddos de Paschighedda aberint in bia de sa Reina Margherita, cun unu muntone de apuntamentos fintzas a meritzeddu.

In Aristanis, in is bighinados antigos de sa tzitade, su coro “Sa Pintadera” at a fàghere unu cuntzertu itinerante, mentras sàbadu ddoe at a èssere sa de deghe editziones de “S’iscalera de su bonucoro” in sa crèsia de Santu Sebastianu. In is bias de is bighinados antigos, imbetzes, ddoe ant a èssere is fainas contivigiadas dae su Tzentru cummertziale naturale.

Tramudende a Marmidda, in Pompu sàbadu e in Bobadri domìnigu ddoe cuncordant duas dies de animatzione cun su tzentru de caddos “Il Giarino”. In Aressa, imbetzes, chenàbura e sàbadu in biblioteca ddoe ant a fàghere laboratòrios criadores, mentras pro domìnigu si previdet su cuntzertu de is Cordas e Cannas. In Bàini sàbadu ddoe faghent “Christmas in Bàini” in pratza de Renzo Lampis, mentras in Useddus est totu prontu pro su Cuntzertu de Paschighedda. Sàbadu in Ollasta ddoe ant a èssere is mercadeddos de Paschighedda, in pratza de su Mercadu, mentras domìnigu in Bobadri, in crèsia ddoe ant a èssere “Sonos … Boghes … Raighinas” e su cuntzertu de s’Orchestra Populare Sarda.

Clima de Paschighedda in Crabas puru chnàbura cun “Cantamus sa Paschighedda 2024”, in sa crèsia de su Spìridu Santu, e domìnigu a merie, in pratza de Don Sturzo, cun s’abertura de sa biddighedda de Babbu Nadale. Abbasanta imbetzes proponet su presèpiu chi bivet sàbadu a merie in pratza de Santa Caderina.

In fines, sa manifestatzione “Abetende sa Paschighedda” at a permìtere de iscobèrrere Fordongianus, mentras in Arcidanu, semper in “Abetende Paschighedda”, sàbadu e domìnigu, s’ant a pòdere bisitare is mercadeddos de Paschighedda e sa biddighedda de Babbu Nadale.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.