Novas Aristanesas, giòbia 12 de nadale de su 2024

Is addòbios de custa coa de chida  – Custa coa de chida puru est rica de addòbios in provìntzia de Aristanis. In Nurachi, ddoe cuncordant sa festa de is Notes de Santa Lughia, in programma fintzas a domìnigu. Oe cumentzant cun su Mercadu de Santa Lughia e, a meritzeddu, a is sete, in pratza ant a allùere su foghilone in onore de sa Santa. A pustis ant a sighire Sa festa in pratza e Sa chena manna.

Su clima ammajadore de Paschighedda at a colorare Cùglieri cun una filera longa de addòbios fintzas a sa Pasca de is Tres Res. S’at a cumentzare sàbadu a merie cun una passigiada in sa bidda pro iscobèrrere is presèpios chi ddoe ant cuncordadu, cun unu cuncursu fotogràficu e cun su Montiferru Play. Domìnigu, imbetzes, at a èssere dedicadu a su teatru cun su laboratòriu “Is pantàsimas de Paschighedda”. In Sabarussa domìnigu, a intro de sa rassigna “Abetende Paschighedda”, ddoe faghent sa festa de is chi ant propassadu sessanta annos, mentras in Santa Justa s’at a pòdere bìere una Paschighedda curiosa: dae cras e fintzas a domìnigu ddoe faghent sa “Paschighedda in s’istàniu cun is fassonis”. Si cumentzat cras a merie cun su cuntzertu de Marino Derosas e Denise Guey, in sa Basìlica de Santa Justa.

In Làconi, sàbadu 14, a is chimbe de merie, ant a presentare su romanzu “Se l’inverno declina” de Eliano Cau. Sa faina dda cuncordat su Comune de Làconi, su Sistema bibliotecàriu “Sarcidanu-Barbàgia de Seulu” e sa Biblioteca comunale laconesa. At a èssere presente s’autore.

In Marmidda puru ddoe at àera de Paschighedda: in Bobadri, chenàbura, ddoe faghent s’addòbiu “Bisiones e faeddos pro faeddare ancoras de violèntzia de gènere”, mentras in Gonnonò sàbadu ddoe est sa de deghe editziones de “Paschighedda in bighinadu”. In Aressa at a èssere unu sàbadu a merie de mùsica, libros e passione pro is biàgios cun Stefano Floris e su recital “Baddende a suta de s’abba” e, in fines, in Ollasta ant cuncordadu unu domìnigu de bonucoro e mùsica.

In Aristanis s’àera de Paschighedda s’at a pòdere respirare in su Tzentru cummertziale naturale “Tzentru Tzitade de Aristanis”: intra de is àteras cosas, custu merie at a tocare a is Superanimadores in sa domighedda de bia de Tirsu e, cras, a su coro polifònicu feminile “Sa pintadera”, chi at a cantare peri is bias de is bighinados antigos de sa tzitade.

In Arcidanu, in custa coa de chida, ddoe faghent “Abetende Paschighedda 2024” cun cuntzertos, ispetàculos e mercadeddos. In fines, in Terraba, domìnigu a merie sonat sa banda “Giuseppe Verdi” in sa crèsia de Santu Pedru Apòstolu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.