Novas Aristanesas, chenàbura 6 de nadale de su 2024

Unu muntone de cussìgios dae Federconsumatori pro sos regalos de Nadale – Benende-nde sas festas de Paschighedda, Federconsumatori cussìgiat comente nche passare unu Nadale sena ispèndere meda, in seguresa e rispetende s’ambiente. Acò unu vademecum pro chi sos comporadores no ispendant meda.

Tocat a istabilèssere unu tantu de ispèndere; podet èssere utilosu a fàghere una lista. Non b’at importu de regalare cosa a totus, difatis s’agatant sos regalos “fatos a cumone”. Si si regalat carchi cosa, mègius chi siat de utilidade, chi serbat a berus: Federconsumatori at notadu chi si punnat a seberare cosas pretzisas, comente pro esempru unu billete pro fàghere unu tratamentu o una vìsita ispetzialìstica.

Mègius a fàghere su paragone de sos prètzios intre butegas diferentes. No est mala s’idea de pischeddas de Nadale fatas in domo, semper apretziadas: pro risparmiare finas su 20-25% in sos produtos de pònnere in sas pischeddas de Nadale, Federconsumatori cussìgiat de si giuare de sas ofertas e de sas promotziones subra de produtos chi tenent iscadèntzia longa. Ammentare semper chi sa cosa fata in domo est un’idea originale e semper prus impreada.

A pustis de sas festas, comintzant sas bèndidas a baratu de istajone: est unu momentu bonu pro fàghere sos regalos de Nadale, risparmiende a bortas finas a su 50%. Finas ocannu Adusbef e Federconsumatori torrant a bogare sa proposta contra a sos imboligàmenes pro evitare de imboligare sos regalos cun paperi chi non serbit e ammentant chi un’idea chi permitit de ispèndere prus pagu est su regalu fatu dae prus de una persone.

Pro Paschighedda si podet seberare de èssere de bonucoro, comporende in sos mercadeddos, assòtzios, butegas de bèndida giusta e solidale. Tocat però a dare atentu a sos produtos farsos, màssimu pro sos chi si dant a sos pitzinnos.

Importante finas s’ambiente: Federconsumatori cussìgiat de andare a fàghere sas còmporas de Nadale cun mezos pùblicos o a bitzicleta, de comporare produtos locales e de minimare e torrare a impreare sos materiales ca s’arga in custas dies creschet meda. In ùrtimu, tocat a averiguare sa seguresa de sos regalos comporados e a custoire sos iscontrinos.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.