Novas Aristanesas, chenàbura 27 de nadale de su 2024

In provìntzia de Aristanis, Babbu Nadale no andat a islita – Si in totu su mundu Babbu Nadale benit a islita tirada dae rennas màgicas chi bolant, in provìntzia de Aristanis sègudat sos mannos e sos piticos subra de sos mezos prus diferentes, leende-nche-lis cuntentesa manna.

In Fenosu, s’òmine prus isetadu dae totu sos pitzinnos est imbàtidu a s’aeroportu subra de s’elicòteru Augusta Bell 212 de su Repartu bolu  VII de sa Politzia de Istadu. Rispetende una traditzione chi oramai est sighende dae sa bellesa de 24 annos, Babbu Nadale at addobiadu in custa manera a 140 pitzinnos, òspites de sos istitutos e de sas istruturas protetas de sa zona de Aristanis.

Paris cun sos donos, s’ominone nche-lis at portadu cuntentesa meda, in unu seranu allegradu dae animadores e dae sos pitzinnos finalistas de su Zecchino D’Oro 2024, Elisabetta Obinu de Tàtari e Andrea Trullu de Dèximumannu.

A Terraba non b’est imbàtidu unu Babbu Nadale ebbia, ma medas e totus a caddu de sas motos: sos mototziclistas de su “Shardana Motocross Team” si sunt bestidos cun sa roba de s’ominone de Nadale, faghende-nche pigare sos pitzinnos a sos mezos issoro a duas rodas, in un’atòbiu semper isetadu meda de su calendàriu de “Sas bias de Nadale”.

A Arriora Babbu Nadale imbetzes b’est imbàtidu a subra de unu mezu particulare meda: unu tratore. Acumpangiadu dae sos dischentes suos de s’Amministratzione comunale e de s’assòtziu Tzerrihouse, chi ant aprontadu s’impresa, su personàgiu sìmbulu de su Nadale at dèvidu rinuntziare a sas rennas suas istimadas. Pro ite? Ca totu in una si sunt romadiadas.

Gasi sos elfos e su capu issoro nche sunt sartiados a subra de unu rimòrchiu e nch’ant leadu sos regalos a sos pitzinnos de sa bidda: los capitanaiat sa figura prus de importu de sa bidda, su sìndigu Lorenzo Pinna. Sas famìllias e sos minoreddos ant atzetadu cun cuntentesa s’idea e ant afestadu cun presu mannu custu signale de sensu de comunidade.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.