Novas Aristanesas, chenàbura 20 de mese de idas de su 2024

Novas Aristanesas, chenàbura 20 de mese de idas de su 2024

Sa provìntzia de Aristanis sighit a si seberare cun sa mùsica gràtzias a s’abilesa de unos cantos artistas – Sunt una pariga is artistas de sa provìntzia de Aristanis chi amegant de si seberare a livellu natzionale gràtzias a sa mùsica issoro.

Cumentzende dae sa cantante aristanesa Cristina Fois, chi in custas chidas passadas at publicadu una cantzone noa pro Paschighedda intitulada “Custa est Paschighhedda”. Sa cantzone bogat unu messàgiu de ispera e de unione contras de sa “suferèntzia, timoria, òdiu e strufuddu, est a nàrrere su pagu incuru chi sa gente tenet pro chie sufrit”. Sa cantzone si piessignat pro una melodia chi t’imprassat e pro faeddos chi regordant su clima de is festas. S’agatat in is prataformas de streaming prus de importu. Fìgia de arte – sa mama est sa cantadora folk Caterina Cimino – in su 2024 at afestadu is 34 annos de ispetàculos cun su “Cristina Fois Live Tour”.

Unu traguardu de importu fintzas pro Chiara Fois, in arte Bluem, nàschida in Aristanis, autora de sa cantzone “Lunis”, campionada in s’album nou de su rapper Marracash “Est acabada sa paghe”. Dd’at fatu a ischire sa cantante aristanesa etotu cun unu post in is social, publicadu s’àtera die. Sa cantzone “Lunis”, bessida in su 2021, faeddat de is relatas in ue si comùnicat pagu e cumentzat cun unu coro chi regordat is sonos e is melodias de su connotu de Sardigna.
Classe 1995, a pustis de su tramudu suo a Londra pro istudiare mùsica, Bluem at cumentzadu su produsimentu de cantzones pro contu suo. In su 2018 at publicadu su discu “Piticheddedda”, mentras in su 2021 est essida “Note”.

E, in fines, ddoe est su musitzista aristanesu Alessio Cuscusa chi, a pustis de una simana de tempus in ue s’est pasadu, at torradu a publicare duos EP noos. A su primu dd’at postu a tìtulu “Sit”, oferit mùsicas de pasu: s’àteru “The Voices of the Champions”, contat de sa vida de tres atletas nòdidos, ponende paris sonoridades de pasu cun s’isport, àtera passione manna de Cuscusa. Custos duos EP ddos at iscritos e prodùsidos issu e s’agatant in is prataformas de streaming prus de importu.

Antoni Nàtziu Garau
Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.