Novas Aristanesas, mèrcuris  27 de santandria de su 2024

Iscobertas archeològicas de importu in sa provìntzia de Aristanis – In sos ùrtimos meses, sa provìntzia de Aristanis est istada protagonista de fainas de importu in su campu de s’archeologia, chi sunt dende iscobertas ispantosas in contu de su passadu de sa Sardigna. Intre sas printzipales si sèberant sas chircas in s’istagnu de Crabas, chi punnant a mustrare s’evolutzione de sa laguna e a cumprèndere comente s’òmine apat isfrutadu sas resursas de sa zona ùmida in sos sèculos. Su progetu de tres annos, coordinadu dae sa Fundatzione Mont’e Prama paris cun sa Subra-Intendèntzia de Casteddu e sas Universidades de Tàtari e de su Salentu, dae pagu tempus at acabbadu sa prima fase. At interessadu a una cambarada de espertos subàcueos pro sas chircas in sos fundales in sas zonas a inghìriu de Mont’e Prama e Conca Illoni, in ue ant iscobertu una stratigrafia archeològica ispantosa, testimòngia de sa frecuentatzione manna de sa zona dae su tempus de sa preistòria e finas a su perìodu tardu-romanu. In custas chircas ant impreadu fintzas sos drones e tecnologias 3D pro mapare sos sitos e tènnere una visione detalliada de su paesàgiu antigu. 

Fintzas in su situ archeològicu de su nuraghe Santu Miali, in Pompu, sunt bessidas a campu iscobertas de importu, comente unu serbatòiu de abba iscavadu in sa roca, de sa fine de s’edade de su Brunzu. Sas chircas ant bogadu a campu fintzas chi su situ fiat impreadu meda in sos perìodos romanos e pùnicos, megiorende sa cumprensione de s’istòria sua e de s’evolutzione de su cortile internu e de su logu de intrada a su bastione. Custos iscavos, dirìgidos dae sa Subra-Intendèntzia de Casteddu, faghent parte de su progetu “A spasso nel tempo”, chi at permìtidu fintzas de comintzare a acontzare sos muros de su nuraghe, cun sa punna de fàghere visitare cussu monumentu a su pùbblicu. In su progetu est previdida fintzas una digitalizatzione de su logu, chi at a permìtere de esplorare su nuraghe a manera interativa, abbalorende gasi su patrimòniu culturale de su logu e apretende su turismu.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.