Novas Aristanesas, mèrcuris 13 de onniasantu de su 2024 

Sa provìntzia de Aristanis e is campiones giòvanos suos – Karate, judo, body building, wingfoil e baddu. Sunt unos cantos isport in ue is giòvanos de sa provìntzia de Aristanis ant mustradu un’abilesa manna, incungende unu muntone de prèmios e reconnoschimentos.

Cumentzamus dae is frades aristanesos Nicolò e Maddalena Spanu, prontos a mòvere a Brasile pro s’ùrtima tapa de su Mundiale de wingfoil, a pustis de is garas in su mare de Casteddu. Sa giòvana Maddalena est in su de duos postos de sa classìfica mundiale, mentras su frade in su de oto. 

Is baddadores de s’Istitutu magistrale “Benedetto Croce” ant bintu imbetzes una medàllia de brunzu in sa “Gymnasiade”, in Bahrain, a ue ddoe ant pigadu parte istudiantes-atletas de 72 natziones diferentes. Is maistros de baddu calabresos Gianluca Conemi e Giorgia Loi sunt intrados imbetzes me in sa lista de is atletas de interessu natzionale.

Ma sutzessos meda sunt arribados fintzas cun is artes martziales: sa provìntzia de Aristanis si podet bantare de àere otentu ùndighi medàllias conchistadas dae is pitzocheddos de su Judo Terraba in is Campionados natzionales Csen de Riccione; e àteras tres medàllias bintas dae is atletas de karate de su PKS Aristanis in su XVI Open International de Santu Marinu.

Pro su chi pertocat su pugiladu, sa provìntzia de Aristanis tenet a duos campiones regionales: su pugilista aristanesu Francesco Saba in sa categoria youth 60 kg e su crabarissu Alessio Bilancetta in sa categoria de 60 chilos. A ambos duos ddos allenat sa Corner Gym Box de Aristanis.

Tramudende a su dressage, is cadderis de “Il giarino” de Gonnacodina si sunt seberados cun tres medàllias de oro, tres de prata e una de brunzu, e cun chimbe primos postos me in is categorias de su Master Fise Sardigna pro su campionadu acasagiadu dae su tzìrculu ìpicu “Is Alinos” de Maracalagonis.

In fines, Filippo Fanari de Boàtiri at bintu unu billete de intrada a is Europeos de body building cun su de tres postos in su de 16 campionados natzionale Natural de Firentze.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.