Novas Aristanesas, martis 19 de onniasantu de su 2024

In provìntzia de Aristanis sunt semper de prus is antzianos e naschent pagos pipios – Cussa de Aristanis est sa provìntzia prus betza de totu sa Sardigna. Ddu narat “Famidos de benidore”, sa de XIX relatas in contu de poberesa e esclusione sotziale fata dae sa Caritas Sardigna pro su chi pertocat su 2023.

Movende dae is datos de s’Istat, su Servìtziu pro is istùdios e is chircas de sa CEI nd’at fatu essire a pìgiu un’edade mesana provintziale prus arta de sa mèdia natzionale de prus de tres annos e de un’annu cunforma a s’edade mesana de sa Sardigna, lompende a 49,8 annos.

E custu torrat paris cun su cuadru demogràficu pintadu in sa relata sotziale provintziale fata dae s’Inps, dae ue si biet chi su nùmeru de is pensionados est semper creschende, mentras su nùmeru de pipios chi naschent est semper prus bassu.

Segundu sa relata, in su 2023 in totu sa provìntzia si contaiant 13.776 pipios intra de 0 e 14 annos, a penas su 9,2% de totu sa populatzione, mentras is persones intra de 15 e 64 annos fiant 91.450, su 61,3%, e cussas prus mannas de 65 annos fiant 43.852, est a nàrrere su 29,4% de is 149.078 abitantes.

De is 434.596 pensionados sardos, sa bellesa de 45.760 bivent in provìntzia de Aristanis: prus a fine, s’Inps pagat sa pensione a 23.023 fèminas e a 22.737 òmines.

E non dat ispera bona su castiare a su saldu naturale de sa populatzione, fatu cunforma a is datos Inps dae su 2012 a su 2022. Si in su primu annu pigadu in cunsideru is nàschidas fiant 969 cun 1850 mortos, si biet un’ismèngua de sighidu de sa populatzione. Duos annos a immoe si sunt contados a penas 668 nàschidas noas e 2.254 mortos.

Nùmeros chi torrant paris, duncas, cun s’analizu fatu dae sa Caritas, chi narat: “Sa chistione demgràfica oramai est de importu mannu. Pro parare fronte a sa chistione de is pagas nàschidas, tocat de fàghere unu pensamentu fungudu in contu de su pro ite in Sardigna siat aici manna sa diferèntzia intra de su disìgiu de fàghere fìgios e de pesare una familliedda e sa possibilidade cuncreta de ddu fàghere”.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.