Novas Aristanesas, martis 12 de onniasantu de su 2024 

Sa provìntzia de Aristanis regordat a is eroes suos – Dae Assou a Gonnostramatza, fintzas a Aristanis, sa provìntzia de Aristanis at regordadu a is militares suos mortos in servìtziu e eroes de gherra.

In su mese de maju, is Carabineris de Aristanis ant regordadu in Assou a s’apuntadu Francesco Deias, mortu in servìtziu in su 2008 e chi, pro cussu, dd’aiant donadu sa Medàllia de Oro pro su Valore Tzivile. Su militare si fiat arruoladu giòvanu in s’Arma de is Carabineris in su 1995: a pustis de una simana in Lombardia, fiat torradu a Sardigna, faghende servìtziu in Tonara e in Patiolla.

Su 23 de maju de sèighi annos a oe fiat intervènnidu pro sucùrrere a unu ghiadore in istadu de ishock pro more de un’intzidente, cando un’àtera vetura, ghiada dae un’imbriagu, nche-dd’aiat treuladu e dd’aiat mortu.

Pratza de Tzitade, in Aristanis, at fatu de guarnissa a sa Die de s’Unidade Natzionale e Die de is Fortzas Armadas, ocasione in ue ant cunsignadu is medàllias pro su valore assignadas in su mese de làmpadas dae su Presidente de sa Repùblica a is militares mortos me in is lager.

Su primu est su finantzieri Salvatore Meloni, fatu presoneri cun una trampa e portadu a trenu a Neubrandenburg, in ue dd’aiant acorradu in unu campu de traballu fintzas a su 1945.

Premiadu fintzas su carabineri aristanesu Sisinnio Spanu, fatu presoneri in Roma e acorradu in unu lager tedescu fintzas a su 1945; e, in fines, su caporale de Abbasanta Arcangelo Pepe, fatu presoneri dae is tedescos cando fiat cumbatende in su fronte frantzesu e acorradu in unu campu de regorta de persones fintzas a sa liberatzione dae parte de is Alleados.

Sa comunidade de Gonnostramatza e sa Guàrdia de Finàntzia ant regordadu, imbetzes, a Renzo Atzei, su finantzieri mortu giòvanu me in is Balcanos, a pustis chi aiat imprassadu sa càusa partigiana. A issu dd’ant intituladu sa caserma de Aristanis, sea de is repartos de su Corpus de sa Guàrdia de Finàntzia de sa provìntzia de Aristanis.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.