Novas Aristanesas, lunis 4 de onniasantu de su 2024

Novas Aristanesas, lunis 4 de onniasantu de su 2024

Is “Cabinas de arte” in provìntzia de Aristanis – Me in is biddas de sa provìntzia de Aristanis is cabinas de s’Enel s’ant a furriare a òperas de arte. In Arcidanu su Comune e E-Distrubuzione ant presentadu s’òpera de arte de istrada chi s’artista sardu Mauro Patta at fatu in su muru de una cabina elètrica. Dd’at intitulada “Icona” e dd’at dedicada a Santa Rita. In sa figura ddoe est una fèmina cun sa bestimenta de su connotu in una posa simmètrica, agiomai che a un’icona sagrada, inghiriada dae piessignos de pintura figuradora e àteros piessignos gràficos imbonidos dae is mimosas e dae is pintaduras dedicadas a is òperas de su tessìngiu sardu.

In su mese de austu, imbetzes, ant avaloradu una cabina elètrica in Uras cun “Recrearth”, unu murale de arte de istrada pensadu pro s’amparu de s’ambiente e pro sarvare is abes, sinnale de importu de sa salude de su sistema ambientale, de sa fortza sua ma fintzas de sa debilesa manna. S’òpera est partzida in bator partes e mustrat is dannos chi faghimus a s’ambiente, ma fintzas s’ispera de una nàschida noa e de unu respetu prus mannu gràtzias a is generatziones noas.

In Paulle puru s’arte urbana dd’ant impreada no isceti comente a aina pro recuperare muros betzos trascurados, ma fintzas pro mandare messàgios de importu pro sa comunidade chi ddoe bivet. In sa bidda de Guiltzier, semper in austu, ddoe ant fatu unu murale dedicadu a is atletas de sa Dinamo Lab Bancu de Sardigna, nàschidu dae sa collaboratzione intra de Enel Distributzione e Fundatzione de Sardigna cun su progetu “Cabinas de Autore”.

In fines, tocat de regordare sa tzitade de Aristanis: inoghe puru in su 2023 – gràtzias a su progetu “Cabinas de autore” – dae sa collaboratzione intra de s’Assessoradu pro is Polìticas giovaniles, Enel e E-Distribuzione, ddoe ant pintadu duas òperas in duas cabinas elètricas in is intradas de sa tzitade. Su tema est su de Sa Sartìllia.

Antoni Nàtziu Garau

Faina fata cun s’agiudu de sa Regione Sardigna – IMPRENTAS 2023-2024 – L.R. 22/2018, art. 22.